BQO-da baılanys operatorlaryna salynǵan aıyppul kólemi 30 mln teńgege jetti
ORAL. KAZINFORM — Batys Qazaqstan oblysynda bıylǵy alty aıda óńiraralyq baılanys ınspektsııasy baılanys operatorlary qyzmetiniń sapa kórsetkishterine sáıkestigin anyqtaý maqsatynda jospardan tys 14 tekserý júrgizdi.
BQO tsıfrlyq tehnologııalar basqarmasynyń basshysy Nurǵısa Qamashevtiń óńirlik kommýnıkatsııalar qyzmetiniń alańynda ótken brıfıngte málim etkenindeı, tekserý nátıjesinde baılanys operatorlaryna 30 mln teńge kóleminde ákimshilik aıyppul salyndy.
Nurǵısa Málikulynyń sózine qaraǵanda, sonyń ishinde Bılaın – 17 mln teńge, Ksell – 9,7 mln, Tele 2/Altel 3,3 mln teńge aıyppul tóledi.
Óńirde 405 aýyldyń 372-sinde nemese 92 paıyzynda turǵyndar ınternet jelisin paıdalanady. Al 376 eldi meken nemese 93 paıyzy dybystyq qońyraýlar úshin uıaly baılanyspen qamtamasyz etilgen.
Jyl basynan beri Bılaın jáne Ksell baılanys operatorlarymen tórt aýylǵa jańa bazalyq stantsııalar ornatyldy.
- Internetke keń jolaqty qoljetimdilikti uıymdastyrý maqsatynda «Qazaqtelekom» AQ 2026 jyly 9 aýdan ortalyǵynda qosymsha 246 km optıkalyq jeli jáne 8368 port salýdy josparlaǵan bolatyn. Bul eldi mekenderde mys jelide otyrǵan 1 718 qoldanystaǵy abonentti optıkalyq jelige kóshirý kózdelgen. Sondaı-aq «Tazartý» jobasy boıynsha 6 myń abonentti (Oral qalasynda – 3 myń, aýyldarda – 3 myń) mys jeliden optıkalyq jelige kóshirý oılastyrylýda. Alty aıdyń qorytyndysy boıynsha Oral qalasynda 103, aýyldarda 206 aǵash tirekter temir-beton tirekterine aýystyryldy, - deıdi N.Qamashev.
Onyń aıtýynsha, «Qoljetimdi Internet» ulttyq jobasy aıasynda 2027 jylǵa deıin 220 eldi mekendi talshyqty-optıkalyq baılanys jelisine qosý josparlanǵan. Qazirdiń ózinde 24 aýylǵa «Qazaqtelekom» AQ «Transtelekom» AQ-men birlesip «Starlink» spýtnıktik termınaldaryn ornatty. Sondaı-aq «Jusan Mobile» AQ 2026 jyly halyq sany 20-dan tómen 8 aýylǵa OneWeb spýtnıktik tehnologııasynyń stantsııasyn iske qosty.
Ulttyq joba aıasynda Ksell baılanys operatorymen Oral qalasynda 5G standartynda 90 bazalyq stantsııasy boı kóterdi.
- Respýblıkalyq avtokólik joldaryn mobıldi keń jolaqty qoljetimdilikpen qamtamasyz etý is-sharasy aıasynda oblysta 7 antenna-dińgek qurylǵysy salynbaqshy. Antennalardyń jer telimderine qatysty qujattary rásimdelip, jobalyq-smetalyq qujattamalaryna memlekettik jáne jeke saraptamalardyń oń qorytyndylary alyndy. Búgingi tańda QR Jasandy ıntellekt jáne tsıfrlyq damý mınıstrligi men «Transtelekom» AQ arasyndaǵy ınvestıtsııalyq kelisimge sáıkes barlyq antenna-dińgek qurylǵylarynyń jobalyq-smeta qujattamalary «Aktıvterdi basqarýdyń tsıfrlyq platformasy. Memlekettik múlik tizilimi» (E-QAZYNA) portalynda aýktsıon arqyly satyldy. 2026 jyly qurylys jumystaryn bastaý kózdelýde, - dep qosty basqarma basshysy.
Eske sala keteıik, budan buryn BQO-da uıaly baılanys operatorlaryna 25 mln astam teńge aıyppul salynǵanyn jazǵan edik.
