BQO-da baılanys operatorlaryna 165 mln teńge aıyppul salyndy
BQO-da 70-ke jýyq aýyl ınternetpen qamtylyp, sapasy jaqsartyldyBatys Qazaqstan oblysynda 70-ke jýyq aýyl ınternetpen qamtylyp, sapasy jaqsartyldy, dep habarlaıdy Kazinform.
BQO tsıfrlyq tehnologııalar basqarmasy basshysynyń mindetin atqarýshy Erǵalı Erjanovtyń óńirlik kommýnıkatsııalar qyzmeti alańynda ótken brıfıngte málim etkenindeı, Batys Qazaqstan oblysynda barlyǵy 413 eldi meken bolsa, sonyń 307-sinde ınternet qoljetimdi.
Onyń sózine qaraǵanda, daýystyq shaqyrýlardy qosqanda, 350-ge jetedi.
Tsıfrlyq damý mınıstrligimen birlesip, Oral qalasy men aýyldardy baılanys jáne ınternet jelisimen qamtý týraly Jol kartasy bekitilgen. Jol kartasy aıasynda naqty kórsetilgen merzimderge sáıkes baılanys operatorlary ınternetpen qamtý jáne sapasyn jaqsartý jumystaryn júrgizýde. 2024 jyly adam sany 250-den asatyn qalǵan 8 aýyl qamtylmaqshy.
Erǵalı Qýanyshbekulynyń aıtýynsha, 2023 jyly Oral qalasy men 87 aýylda mobıldi ınternetpen qamtý jáne sapasyn jaqsartý josparlansa, kúni búginge deıin 68 eldi mekenniń 28-inde jańa bazalyq stantsııa ornatyldy. 39 aýylda 4G standartyn qosý arqyly ınternettiń sapasy jaqsartyldy.
Jyl sońyna deıin 2 aýylda mobıldi baılanys sapasy jaqsartylady, qalǵan 17 eldi meken kelesi jylǵa aýystyryldy.
«Bıyl óńiraralyq baılanys ınspektsııasy nysandarǵa barý arqyly baılanys operatorlarynyń qyzmettiń sapa kórsetkishterine sáıkestigine qatysty jospardan tys 63 tekserý júrgizdi. Barlyǵy 25 aýylda jáne Oral, Aqsaı qalalaryndaǵy tekseris nátıjesinde 165 mln teńge aıyppul (ótken jyly – 46 mln teńge) salyndy», - deıdi E.Erjanov.
Onyń málimetinshe, Tsıfrlyq damý mınıstrligi tarapynan «Qoljetimdi ınternet» pılottyq ulttyq jobasy ázirlendi. Ortalyq organdarmen kelisilgennen keıin joba bekitilmek. Mundaǵy maqsat – halyq pen bıznesti joǵary jyldamdyqty ınternetpen qamtý.
«Ulttyq joba aıasynda oblysta 234 eldi meken talshyqty-optıkalyq baılanys jelisimen qamtylmaqshy (2024 jyly – 44, 2025 jyly – 71, 2026 jyly – 78, 2027 jyly – 41, barlyǵy 733 núkte qosylmaqshy). Oǵan qosa sol aýyldardaǵy áleýmettik nysandar men turǵyndardy keń jolaqty ınternetpen qamtý qarastyrylǵan. Adam sany 50-ge jetpeıtin 44 aýylǵa spýtnıktik tehnologııa arqyly ınternetpen qamtý boıynsha usynys berildi», - dedi E.Erjanov.
Taǵy bir jańalyq, 15 jeltoqsannan bastap oblys ortalyǵynyń turǵyndaryna qyzmet kórsetý sharttaryn qaıta jasasý úshin qr.gov.kz portaly ashyldy. Endi Oral qalasynyń turǵyndaryna árbir kommýnaldyq uıymǵa jeke barýdyń qajeti joq. Osy portal arqyly «Jaıyqjylýqýat», «Oral taza servıs», «QazTranGazAımaq», «Batys sý arnasy» jáne «Batys energo resýrsy» mekemelerimen onlaın-sharttardy jasaý múmkindigi bar.
«Qyzmet yńǵaıly jáne ıntýıtıvti, ótinish berýshi mindetti qujattardyń tizimin, sondaı-aq qyzmetti alý merzimin birden kóredi. Qyzmet nátıjesi ótinish berýshiniń nómirine SMS arqyly túsedi. Sonymen qatar iKomek 109 biryńǵaı baılanys ortalyǵy arqyly qosymsha keńes alýǵa bolady. Qyzmetti alý úshin turǵyndarǵa tek elektrondy tsıfrlyq qoltańba qajet», - dedi basqarma basshysynyń mindetin atqarýshy.
