BQO-da baýyrlaryn órtten alyp shyqqan 16 jastaǵy qyz marapattaldy
ORAL. QazAqparat – Batys Qazaqstan oblysynyń Jánibek aýdanynda 16 jastaǵy Dana Ótebaeva QR Tótenshe jaǵdaılar mınıstrliginiń «Órtte kórsetken qaısarlyǵy úshin» medalimen marapattaldy, dep habarlaıdy QazAqparat tilshisi.
Táýelsizdik merekesine oraı ótken saltanatty is-sharada Jánibek aýdanynyń ákimi Azamat Safımalıev marapatty Dana Ótebaevaǵa tabys etti.
Eske salsaq, Jánibek aýylynda turǵyn úıde bolǵan órtten 37 jastaǵy áıel – Dananyń anasy qaza bolǵan edi. Dana Ótebaeva órt sóndirýshiler jetkenge deıin ózinen kishi úsh baýyryn terezeden shyǵaryp, qutqaryp qaldy.
Qazirgi kezde tórt bala kórshiles Bókeı ordasy aýdany Saıqyn aýylyndaǵy naǵashy ájeleriniń qolynda. Oqıǵadan keıin balalardyń máselesi jergilikti ákimdik janyndaǵy komıssııa otyrysynda qaralyp, olar ájesiniń qamqorlyǵyna berildi. Dana Jánibek aýylyndaǵy T.Jarokov atyndaǵy orta mekteptiń 11-synybynda bilim alyp kelgen edi. Kúni búgin Saıqyndaǵy M.S.Babajanov atyndaǵy orta mektepte oqýyn jalǵastyrýda.
