BQO-da baýkespe ury jábirlenýshilerge 7 mln teńge zalal keltirgen

ORAL. QazAqparat – Batys Qazaqstan oblysynda jábirlenýshilerge 7 mln-nan astam teńge zalal keltirgen baýkespe ury ustaldy, dep habarlaıdy QazAqparat tilshisi.

BQO polıtsııa departamentiniń baspasóz qyzmeti málim etkenindeı, 31 jastaǵy ury 2019-2021 jyldar aralyǵynda 37 urlyq jasaǵan.

Kúdikti jeke úılerden, salynyp jatqan nysandardan, garajdardan qurylys quraldaryn, altyn buıymdar, aqsha jymqyrǵan. Onyń urlyqty túngi ýaqytta jasaǵany anyqtaldy. Qurylys zattaryn bazarǵa aparyp, satsa, altyn buıymdardy lombardqa ótkizgen, aqshany óz qajetine jumsaǵan.

Qazirgi kezde keltirilgen shyǵyn 7 mln teńgeden asyp otyr, onyń 65 paıyzdan astamy óndirilgen.

«Atalǵan derek boıynsha QR QK 188-baby 3-bóligine (iri mólsherde jasalǵan urlyq) sáıkes sotqa deıingi tergeý amaldary júrgizilýde. Kúdikti QR Qylmystyq is júrgizý kodeksi 128-baby tártibimen ýaqytsha oqshaýlaý ızolıatoryna qamaldy», dep habarlady vedomstvodan.

Eske sala keteıik, budan buryn BQO-da qylmystyq toptyń maldy atyp alyp ketip otyrǵanyn jazǵan bolatynbyz.