BQO-da bastaýysh synyp shákirtteri úshin 2500-den astam kezekshi synyp ashylmaq
ORAL. QazAqparat – Eldegi epıdemıologııalyq ahýalǵa baılanysty BQO bilim ordalarynda oqý qashyqtan, sondaı-aq sanıtarlyq jaǵdaıy turaqty, shákirt sany az aýyl mektepterinde shtattyq rejımde uıymdastyrylady, dep habarlaıdy QazAqparat tilshisi.
Oblystyq bilim basqarmasynyń basshysy Aıgúl Myńbaevanyń aıtýynsha, óńirde 146 mektep 91 myńnan astam oqýshyǵa qashyqtan bilim bermekshi.
Al 20 myńnan astam oqýshysy bar 234 mektep shtattyq rejımde jumys jasaıdy.
Aıgúl Ádilgereıqyzynyń sózine qaraǵanda, qashyqtan oqytatyn mektepterde bastaýysh synyp shákirtteriniń jas erekshelikterine, ózdiginen bilim alý daǵdysynyń endi-endi qalyptasatynyna baılanysty mektepaldy daıarlyq jáne 1-4 synyp oqýshylary úshin ata-analardyń ótinishi boıynsha kezekshi synyptar ashylady. Mundaǵy bala sany 15-ten aspaıdy. Oblysta 30688 shákirt bilim alatyn 2539 kezekshi synyp ashý kózdelip otyr.
Shtattyq rejımde jumys jasaıtyn mektepter men kezekshi synyptarda sanıtarlyq-epıdemıologııalyq talaptar qatań saqtalady. Bilim ordalary dezınfektsııalyq quraldarmen tolyqtaı qamtamasyz etildi.
Qashyqtan oqytýdy uıymdastyrý úshin mektep muǵalimderdiń negizgi suranystaryna saı keletin eń qolaıly ınfraqurylymy men bilim mazmuny bar ınternet-platformany tańdaıdy. Oblystyń 153 mektebi Bilimland, 1 mektep Edupage bilim platformasyna qosyldy, bul platformalarda 25 tamyzdan bastap synaq sabaqtary ótýde.
Oqý formatyna qaramastan, respýblıkalyq «El arna», «Balapan» teledıdarlyq sabaqtary qosymsha bilim berý resýrsy retinde qoldanylady.
Shákirtterdi oqý protsesine qajetti kompıýter jáne ınternetpen qamtamasyz etý jumystary júrgizilýde. Mektepterdegi kompıýterler balalarǵa ýaqytsha paıdalanýǵa beriledi.
«1 qyrkúıek – Bilim kúninde jalpy mektepshilik jıyndar bolmaıdy. Ár synypta synyp saǵattary bolady. Merekelik sharalardyń eki túri qarastyryldy. Birinshiden, shtattyq negizdegi jáne kezekshi synyptyń oqýshylary úshin kabınetterde synyp saǵattary ótkiziledi. Ekinshiden, qashyqtan oqıtyn oqýshylarǵa synyp saǵattary onlaın túrinde bolady, olarǵa mektepke kelýdiń qajeti joq», dedi A.Myńbaeva.
Eske sala keteıik, budan buryn BQO mektepterinde vıdeokameralar ornatylyp jatqanyn jazǵan bolatynbyz.
