BQO-da «Bastaý bıznes» jobasy boıynsha 2 myńnan astam adam bilim almaq
ORAL. QazAqparat - Batys Qazaqstan oblysynda «Bastaý bıznes» jobasy boıynsha 2 myńnan astam adam bilim almaq, dep habarlaıdy «QazAqparat» tilshisi.
Oblys ákimi Altaı Kólginovtiń aıtýynsha, ınnovatsııalyq bıznes jobalardy júzege asyrý úshin 100 AEK-ten aspaıtyn granttar bólinetin bolady.
Memleket basshysy «Prezıdenttiń bes áleýmettik bastamasy» atty halyqqa úndeýinde shaǵyn nesıe berýdi kóbeıtýge arnaıy toqtalǵany belgili.
Elbasy 2017 jyly jalpy somasy 32 mlrd teńge bolatyn 7200 shaǵyn nesıe berilgenin atap ótken bolatyn. Orta jáne shaǵyn bıznes - kez kelgen memleket ekonomıkasynyń altyn tiregi. Prezıdenttiń 2050 jylǵa qaraı ishki jalpy ónimdegi orta jáne shaǵyn bıznestiń úlesin 50 protsentke deıin jetkizý týraly naqty tapsyrmasy bar. Qazirgi tańda Batys Qazaqstan oblysynda bul kórsetkish 42 protsentti quraıdy.
Oblysta kásipkerler bastamalaryn qoldaýǵa baǵyttalǵan «Bastaý bıznes» jobasy belsendi júzege asyrylýda. Mysaly, ótken jyldan bastap qolǵa alynǵan Nátıjeli jumyspen qamtý jáne jappaı kásipkerlikti damytý baǵdarlamasy aıasynda óńirde 2,5 mlrd teńge bólindi. 300-den astam turǵyn óz kásibin ashsa, 938 adam kásipkerlik negizderine oqyp shyqty. «Bastaý bıznes» boıynsha qarjylandyrylǵan jobalardyń 80 paıyzy aýyl sharýashylyǵy salasymen baılanysty.
Elbasy tapsyrmasyna sáıkes bıyl bıznesti shaǵyn nesıeleýge 5 mlrd shamasynda teńge bólinedi. Bul oblys turǵyndarynyń iskerlik qabiletin kóterýge yqpal etetini sózsiz.
«Prezıdent bastamasy eki negizgi máseleni sheshýge septesedi, biri - áleýmettik (turǵyndardy jumyspen qamtý, kásipkerlerdi yntalandyrý), ekinshisi - ekonomıkalyq (bıznes qyzmeti salasyn keńeıtý, jańa jumys oryndaryn ashý jáne kásipkerlik nysandarynyń qarjylyq turaqtylyǵyn qamtamasyz etý). Osy baǵytta naqty josparly jumystar atqarylatyn bolady», dedi óńir basshysy.
Foto: zhaikpress.kz
