BQO-da básekelestikti qorǵaý salasynda zań buzýshylyqtar anyqtaldy

QR Básekelestikti qorǵaý jáne damytý agenttigi BQO boıynsha departamentiniń basshysy Saǵyndyq Irǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, keıbir aýdan ákimdikteriniń halyqqa qatty turmystyq qaldyqtardy shyǵarý qyzmetterin kórsetý úshin merdiger uıymdy aıqyndaý maqsatynda konkýrsty zańnamada belgilengen tártipke sáıkes ótkizbegeni anyqtaldy. 

Departament basshysynyń sózine qaraǵanda, bul básekelestikke teris áser etip, onyń shektelý qaýpin týǵyzdy. Buzýshylyqtar joıyldy. 

- Sonymen qatar suıytylǵan gazdy bólýdi uıymdastyrýǵa jaýapty memlekettik organ zań talaptaryn buzǵan. Atap aıtqanda, suıytylǵan gazdy bólý týraly komıssııaǵa zańnamada kózdelmegen uıym ókilderi engizilgen. Bul sheshim naryqqa qatysýshylar úshin teń jaǵdaı jasaý qaǵıdattaryna keri áserin tıgizýi múmkin. Sol sekildi jeke kásipkerlik sýbektilerine balyq sharýashylyǵy salasyndaǵy memlekettik qoldaý sýbsıdııalaryn berýge jaýapty memlekettik organ qyzmetinde zańnamany buzý belgileri anyqtaldy. ıAǵnı ótinish berýshilerge sýbsıdııa berýden bas tartý sebepteri kórsetilgen sheshimder jiberilmegen, - dedi S.Irǵalıev.

Onyń aıtýynsha, sport salasyndaǵy memlekettik organ sporttyq tapsyrysty ornalastyrýǵa arnalǵan tuǵyrnamany tańdaý barysynda jekelegen naryq sýbektisine negizsiz artyqshylyq kórsetken. 

Departament derekterine sáıkes zań buzýshylyqtardy joıý týraly habarlamalardyń basym bóligi erikti túrde jáne tolyq kólemde oryndaldy. Bul qabyldanyp jatqan profılaktıkalyq sharalardyń tıimdiligin kórsetedi. Oǵan qosa zań buzýshylyqtar negizinde tergep-tekserý júrgizbeı, básekelestik ortany qalpyna keltirýge múmkindik beredi.

Eger habarlamalar belgilengen merzimde oryndalmaǵan jaǵdaıda zańnamaǵa sáıkes tergep-tekserý taǵaıyndalady. Mysaly, qazirgi kezde qatty turmystyq qaldyqtardy shyǵarý qyzmetteri boıynsha konkýrsty ótkizý týraly habarlamany oryndamaǵan memlekettik organǵa qatysty tergep-tekserý bastaldy.

Sondaı-aq Oral qalasy prokýratýrasynyń talaby negizinde avtomobıl joldaryna arnalǵan jobalaý-smetalyq qujattamasyn ázirleý kezinde jekelegen naryq sýbektisine artyqshylyq berý belgileri boıynsha memlekettik organǵa qatysty tergep-tekserý taǵaıyndaldy.

Memlekettik organdardyń memlekettik satyp alýdy bir kózden alý tásilimen júzege asyrý múmkindigin qaraý týraly ótinishin qaraý departament qyzmetiniń biri bolyp esepteledi. Mundaı tásilge monopolııaǵa qarsy organnyń osyndaı taýarlardy óndiretin nemese qyzmet kórsetetin basqa jeke kásipkerlik sýbektisiniń joqtyǵy týraly qorytyndysy bolǵan jaǵdaıda jol beriledi.

- Bórli aýdanynda memlekettik organdardyń biri konkýrstyq rásimderdi júrgizbesten 12 mln teńgege satyp alýdy júzege asyrǵysy kelgen. Buǵan negiz retinde yqtımal ónim jetkizýshide paıdaly modelge patenti men generatordyń avtomatty júıesi bar ekendigin kórsetken. Alaıda taldaý kezinde naryqta mundaı avtomattandyrylǵan júıeniń sany jetkilikti ekendigi belgili boldy. Budan bólek, qazirgi zamanǵy benzın jáne dızel generatorlary óndirýshi zaýytta rezervtik qorektendirýdi avtomatty túrde qosyp aıyratyn júıemen qamtamasyz etilgen. Sondyqtan paıdaly modelge patenttiń bolýy atalǵan salada básekelestiktiń joqtyǵyn bildirmeıdi. Sondyqtan memlekettik organǵa satyp alýdy konkýrstyq rásimdeýsiz júrgizýden bas tartyldy, - dep qosty departament basshysy.

Eske sala keteıik, budan buryn BQO-da 90-nan astam kásipkerdiń saýda baǵasyn asyryp satqany belgili bolǵanyn jazǵan edik.