BQO-da balyq aýlaý erejesin buzǵan 45 adamǵa aıyppul salyndy

ORAL. QazAqparat – Batys Qazaqstan oblysynda «Bekire – 2023» jedel aldyn alý is-sharasy barysynda 45 adamǵa aıyppul salyndy, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkendeı, olar QR Ákimshilik quqyq buzý kodeksi 383-babyna sáıkes jaýapkershilikke tartylyp, 776 250 teńge aıyppul «arqalady».

«Sonymen qatar QR QK 335-baby 1-bóligine (balyq resýrstaryn, basqa da sý janýarlaryn nemese ósimdikterin zańsyz alý) sáıkes 8 derek boıynsha sotqa deıingi tergeý amaldary bastaldy. Mysaly, Aqjaıyq aýdany Jańabulaq aýyldyq okrýgi Bitik sý qoımasy janynda «Toıota-RAF-4» markaly avtokóligi tekserildi. Oral qalasynyń 1947 jylǵy turǵyny tıisti qujattarsyz balyq tasymaldaǵan. Polıtsııa qyzmetkerleri rezeńke qaıyq pen torlarmen aralasqan 8 qap balyqty tárkiledi. Sol sekildi Aqjaıyq aýdany Shabdarjap aýyly mańynda Jaıyq ózeninen zańsyz balyq aýlady degen kúdikpen 1988 jáne 1989 jylǵy er adam ustaldy. Olardan úsh balyq aýlaý quraly, aǵash qaıyq, 14 qap balyq alyndy», - dep habarlady vedomstvodan.

Eske sala keteıik, budan buryn BQO-da kýáligi joq júrgizýshiniń jol erejesin bir kúnde 13 ret buzǵanyn jazǵan bolatynbyz.