BQO-da balasy túngi ýaqytta júrgeni úshin 2 300-ge jýyq ata-ana jaýapqa tartyldy
ORAL. KAZINFORM – Batys Qazaqstan oblysynda jyl basynan beri kámeleke tolmaǵandar tarapynan jasalǵan quqyq buzýshylyqtar boıynsha 2 900 ákimshilik hattama toltyryldy.
BQO Polıtsııa departamenti bastyǵynyń orynbasary, polıtsııa polkovnıgi Ernar Sultanǵalıevtiń málim etkenindeı, QR Ákimshilik quqyq buzýshylyq týraly kodeksiniń 442-baby boıynsha (kámeletke tolmaǵandardyń túngi ýaqytta oıyn-saýyq oryndarynda nemese turǵynjaıdan tys jerlerde zańdy ókilderinsiz júrýi) 2 275 ata-ana jaýapkershilikke tartyldy.
Onyń sózine qaraǵanda, sonymen qatar atalǵan kodekstiń 127-baby (balalardy tárbıeleý jónindegi mindetterdi oryndamaý) boıynsha 370 ata-ana ákimshilik jazaǵa ilikti.
- Qazirgi ýaqytta ishki ister organdarynyń profılaktıkalyq esebinde devıantty minez-qulyq kórsetken 168 jasóspirim, 146 qolaısyz otbasy tirkelgen, bul otbasylarda 261 bala tárbıelenip jatyr. Osy kezge deıin kámeletke tolmaǵandar 37 qylmysqa barǵan. Al olardyń ózderine qatysty 90 quqyq buzýshylyq jasaldy. Atalǵan quqyq buzýshylyqtar boıynsha 91 jasóspirim kámeletke tolmaǵandar isteri jónindegi komıssııanyń qaraýyna jiberildi. 2 bala arnaıy bilim berý mekemesine ornalastyryldy, - dedi E.Sultanǵalıev.
Departament bastyǵy orynbasarynyń aıtýynsha, oblys joldarynda balalarǵa qatysty 96 jol-kólik oqıǵasy tirkeldi. Ókinishke qaraı, 4 jasóspirim qaıtys bolyp, 114-i túrli dene jaraqatyn aldy.
- 40 jol apatynda balalar jaıaý júrginshi retinde zardap shekse, 45-inde kólikte otyrǵan. Beseýinde samokat, úsheýinde velosıped, taǵy úsheýinde avtokólik nemese mototsıkl tizgindep, jol-kólik oqıǵasyna tap bolǵan. Jazǵy ýaqytta jasóspirimder arasynda quqyq buzýshylyqqa jol bermeý, olardyń quqyqtaryna qaıshy áreketterdi boldyrmaý, sondaı-aq balalar lagerleri men demalys oryndarynda qoǵamdyq tártipti qamtamasyz etý maqsatynda polıtsııa qyzmetkerleri táýlik boıy kezekshilik etedi, - dedi E.Sultanǵalıev.
Eske sala keteıik, budan buryn Batys Qazaqstanda jaz kezinde 620-ǵa jýyq lager jumys isteıtinin jazǵan bolatynbyz.