BQO-da balany urǵan mektep dırektoryna qatysty sot úkimi shyqty
ORAL. QazAqparat – Batys Qazaqstan oblysynda balany urǵan mektep dırektoryna qatysty úkim shyqty, dep habarlaıdy QazAqparat tilshisi.
BQO sotynyń baspasóz qyzmeti málim etkenindeı, oqıǵa aýdandardyń birindegi mektep dırektorynyń qabyldaý bólmesinde bolǵan.
Kezekshi muǵalim sol jerge tártip buzǵan M. esimdi 11-synyp oqýshysyn shaqyrǵan. A. esimdi mektep dırektory kezekshi muǵalimniń kózinshe jasóspirimniń betine, denesine birneshe soqqy jasap, jeńil dene jaraqatyn keltirgen.
BQO kámeletke tolmaǵandar isteri jónindegi mamandandyrylǵan aýdanaralyq sotynyń úkimimen atalǵan mektep dırektory QR QK 140-baby 2-bóligine (qatygezdik tanytýmen ulasqan kámeletke tolmaǵan adamdy tárbıeleý jónindegi mindetterdi oryndamaý) sáıkes aıypty dep tanyldy.
Dırektordyń birinshi ret qylmystyq quqyqbuzýshylyqqa barǵany eskerilip, oǵan 80 AEK kóleminde 202 myń teńge aıyppul salyndy. Sondaı-aq pedagogıkalyq laýazymdy qyzmetti jáne kámeletke tolmaǵandarmen baılanysty jumysty atqarýdan 2 jyl merzimge shettetildi.
Sonymen qatar BQO bilim basqarmasy basshylyǵy atyna osyndaı quqyqbuzýshylyqtyń aldyn alý, óńir mektepterinde bilim alýshylarǵa qaýipsiz keńistik qalyptastyrý, sala qyzmetkerleri arasynda túsinik jumystaryn júrgizý maqsatynda jeke qaýly qabyldandy.
Sot úkimi zańdy kúshine engen joq.
