BQO-da balalarǵa qol kótergen bapkerge is qozǵaldy

ORAL. QazAqparat – Batys Qazaqstan oblysynda balalarǵa qol kótergen bapkerge qatysty ákimshilik is qozǵaldy, dep habarlaıdy QazAqparat tilshisi.

BQO polıtsııa departamentiniń resmı ókili Bolatbek Nurǵojınniń málim etkenindeı, oqıǵa 13 aqpan kúni 2013 jylǵy jasóspirim jaraqat pýnktine júgingennen keıin belgili boldy.

Onyń sózine qaraǵanda, balaǵa samaı tusy kógergen degen dıagnoz qoıylǵan.

«Sol kúni jasóspirimniń anasy bapkerge qatysty shara qoldaný jóninde shaǵym túsirdi. Balaǵa qol kótergen Shyńǵyrlaý aýylyndaǵy dene shynyqtyrý-saýyqtyrý kesheniniń 1974 jylǵy bapkeri anyqtaldy. 14 aqpan kúni jasóspirimniń anasynan qandaı ma bolsyn isti qaraýdy toqtatý jáne taraptardyń kelisimge kelgeni jóninde taǵy bir aryz tústi. Alaıda Shyńǵyrlaý aýdany polıtsııa bóliminiń qyzmetkerleri bapkerge qatysty QR Ákimshilik quqyqbuzýshylyq kodeksi 73-2-baby 1-bóligine (uryp-soǵý) sáıkes ákimshilik hattama toltyrdy. Bul bap boıynsha aıypty dep tanylǵan adam on aılyq eseptik kórsetkish mólsherinde aıyppul salýǵa ne on táýlikke deıingi merzimge ákimshilik qamaqqa alýǵa jazalanady. BQO dene shynyqtyrý jáne sport basqarmasyna atalǵan bapkerdiń tártibin qaraý jáne tártiptik shara qoldaný jóninde usynym joldandy»,-dedi B.Nurǵojın.

BQO dene shynyqtyrý jáne sport basqarmasy basshysynyń orynbasary Jeńis Nyǵmetýllın bolǵan oqıǵaǵa qatysty túsinik berdi.

Onyń aıtýynsha, 13 aqpan kúni Shyńǵyrlaý aýdany balalar-jasóspirimder sport mektebindegi sambo kúresi bóliminiń jattyqtyrýshysy Qaısar Qusaıynov jattyǵý kezinde tárbıelenýshiler A.Myrzahandy jáne N.Jurmaǵambetti soqqyǵa jyqqan.

«Sol kúni oqýshylardyń ata-analarynan aryz túsip, Q.Qusaıynov jergilikti polıtsııa bólimine shaqyrtyldy. Jattyqtyrýshy Q.Qusaıynov balalardyń ata-analarynan keshirim surady. Sportshylardyń ata-analary jattyqtyrýshyny keshirip, óz aryzdaryn keri aldy. Áıtse de Shyńǵyrlaý dene shynyqtyrý-saýyqtyrý kesheniniń ákimshiligi bolǵan oqıǵa týraly vıdeony turǵyndar arasynda taratyp jiberdi. Kúni búgin Q.Qusaıynov uly Aldııar Saıynnyń Astana qalasynda ótip jatqan dzıýdodan jasóspirimder arasyndaǵy Qazaqstan Respýblıkasynyń chempıonatyna qatysýyna baılanysty óz qarajaty esebinen issaparǵa ketti. Qyzmetke 20 aqpan kúni shyǵady. Jumysqa shyqqan soń Q.Qusaıynovtyń is áreketine baǵa berý úshin qyzmettik tekseris júrgiziledi», - dedi J.Nyǵmetýllın.

Eske sala keteıik, budan buryn Oralda joǵalyp ketken oqýshy qyzdyń bes kúnnen keıin aman-esen tabylǵanyn jazǵan bolatynbyz.

Vıdeodan alynǵan kadr