BQO-da balalardyń oıynynan 156 tonna shóp órtenip ketti
ASTANA. QazAqparat - Batys Qazaqstan oblysynda sharýa qojalyǵynan órt shyqty, dep habarlaıdy Qazaqparat tilshisi QR ІІM Tótenshe jaǵdaılar komıtetine silteme jasap.
430 sharshy metr aýmaqty sharpyǵan órt 5 saǵatqa sozylǵan.
«20 qazan kúni saǵat 17:15-te Batys Qazaqstan oblysy Jańaqala aýdany Súgiráli aýylyndaǵy sharýa qojalyǵynyń órtenýi týraly aqparat kelip tústi. Eń jaqyn órt sóndirý bólimi 5 shaqyrym jerde ornalasqan. Tilsiz jaýdan 430 sharshy metr aýmaq órtendi», - dep habarlady QR ІІM Tótenshe jaǵdaılar komıtetiniń resmı ókili Nursultan Nurahmetov.
Keshki saǵat 20:37-de órt aýyzdyqtalyp jáne 22:45-te tolyq sóndirilgen. Saldarynan 156 tonna shóp janyp ketti.
«Órtten eshkim zardap shekken joq. Aldyn ala boljam boıynsha, órt balalardyń oıynynan shyqqan», - deıdi resmı ókil.
Órtti sóndirýge oblystyq TJD 5 órt sóndirýshisi men arnaıy mamandandyrylǵan 2 tehnıkasy jáne erikti órtke qarsy quramnyń 24 qyzmetkeri men 3 tehnıkasy jiberilgen.
