BQO-da balalar men jasóspirimder fýtbolyn damytýǵa mán berilmek
ORAL. QazAqparat - Batys Qazaqstan oblysynda balalar men jasóspirimder fýtbolyn damytýǵa barynsha mán berilmek. Bul týraly oblys ákimi Altaı Kólginovtiń «Aqjaıyq» fýtbol klýby oıynshylary men jattyqtyrýshylar quramymen kezdesýinde aıtyldy, dep habarlaıdy QazAqparat tilshisi.
Bıylǵy maýsymda alda turǵan maqsat-mindetter talqylanǵan júzdesýde óńir basshysy jergilikti oıynshylardy daıarlaý, aımaqtaǵy balalar men jasóspirimder fýtbolyn damytý máselesine toqtaldy.
BQO dene shynyqtyrý jáne sport basqarmasynyń basshysy Ásııa Amanbaevanyń aıtýynsha, «Aqjaıyq» fýtbol klýby 2018-2022 jyldarǵa arnalǵan balalar men jasóspirimder arasynda fýtboldy damytý baǵdarlamasyn bekitti. Sondaı-aq «Aqjaıyq» fýtbol ortalyǵynda 23 topta 5-18 jas aralyǵyndaǵy 700 jetkinshek jattyǵady.
Fýtboldan premer-lıga komandalary arasynda el birinshiliginde óner kórsetetin «Aqjaıyq» komandasynyń bas bapkeri Vladımır Mazıar klýbqa erekshe nazar aýdarǵany úshin oblys ákimine alǵysyn bildirdi. Ol bıyl Túrkııada qos birdeı oqý-jattyǵý jıynyn ótkizip, chempıonattyń alǵashqy kezdesýlerin ótkizip úlgergen «Aqjaıyqtyń» quramynda 23 oıynshy bar ekendigin jetkizdi. Solardyń 15-i qazaqstandyq bolsa, sonyń jeteýi - Oral fýtbolynyń túlekteri, sondaı-aq 8 legıoner bar.
«Oblys turǵyndary «Aqjaıyqty» qoldaıdy. Bıylǵy maýsymda nátıjeli oıyn órnegin kórsetip, jankúıerler úmitin aqtaıdy dep senemiz», dedi Altaı Kólginov.
Aıta keteıik, «Aqjaıyq» el birinshiliginiń besinshi týrynda 14 sáýir kúni Aqsaı qalasyndaǵy «Qarashyǵanaq» stadıonynda chempıonat barysynda birde-bir upaı joǵaltpaı, «Astanamen» birge kósh bastap kele jatqan Shymkenttiń «Ordabasy» komandasyn qabyldaıdy.
