BQO-da balaǵat sóz aıtqan ákimdiktiń apparat basshysy qatań sógis aldy

ORAL. KAZINFORM – QR Memlekettik qyzmet isteri jónindegi agenttigi BQO boıynsha ádep keńesiniń otyrysynda Jańaqala aýdany ákiminiń apparat basshysy Aqan Qapanovtyń tártiptik isi qaraldy.

Keńes otyrysynda málim bolǵanyndaı, A.Qapanov aýdandyq máslıhat tóraǵasymen kıkiljińge kelgen. Sodan keıin jaǵa jarmasý barysynda oǵan balaǵat sóz aıtqan.

Ádep jónindegi keńes músheleri máseleni talqylaı kelip, basym daýyspen apparat basshysyna qatań sógis berý týraly uıǵarymǵa keldi.

- Ádep normalary – memlekettik qyzmettiń basty tiregi. Memlekettik qyzmetshi óziniń ár isinde ádildik, ashyqtyq jáne jaýapkershilik qaǵıdatyn ustanǵanda ǵana halyq senimi artady. Al atalǵan qyzmetshi ádep normalaryna qaıshy keletin áreketter jasaǵan. Sondyqtan qatań sógis túrinde tártiptik jaýapkershilikke tartý týraly sheshim qabyldandy, - dedi departament basshysy, ádep jónindegi keńes tóraǵasy Murat Baısalov.

Sonymen qatar keńes otyrysynda 2025 jyldyń qorytyndysymen qumar oıyndarǵa jáne bás tigýge qatysý derekteri boıynsha tártiptik jaýapkershilikke tartylǵan memlekettik qyzmetshilerge qatysty ádep jónindegi ýákilder júrgizgen taldaý nátıjelerine nazar aýdaryldy.

Eske sala keteıik, budan buryn BQO-da 42 laýazymdy qyzmetkerge 3,3 mln teńge ákimshilik aıyppul salynǵanyn jazǵan edik.