BQO-da azyq-túlik baǵasyn negizsiz kótergen 177 kásipker jaýapqa tartyldy

ORAL. KAZINFORM – Batys Qazaqstan oblysynda jyl basynan beri azyq-túlik baǵasyn zańsyz kótergen 177 kásipkerlik nysanyna qatysty ákimshilik is qozǵaldy.

BQO boıynsha saýda jáne tutynýshylardyń quqyqtaryn qorǵaý departamentiniń basshysy Elmıra Qımatovanyń málim etkenindeı, atalǵan nysandarǵa QR Ákimshilik quqyq buzýshylyq týraly kodeksiniń 204-4-babyna sáıkes (áleýmettik mańyzy bar azyq-túlik taýarlaryna saýda ústemesiniń mólsherin arttyrý) 85 eskertý berilip, 92 aıyppul salyndy.

Elmıra Nurqyzynyń sózine qaraǵanda, departament satýshylardyń taýar baǵasyn kórsetpeı ótkizý, vıtrınadaǵy baǵa men kassadaǵy baǵanyń sáıkes kelmeý derekteri boıynsha da ákimshilik is qozǵaýǵa quqyly. Osyǵan baılanysty kásipkerlik nysandaryna qatysty atalmysh kodekstiń 193-baby 4 jáne 5-bóligi (Qazaqstan Respýblıkasynyń saýda qyzmetin retteý týraly zańnamasyn buzý) boıynsha 11 hattama jasaldy.

– Sondaı-aq eki bazarǵa qatysty kodekstiń 204-2-babyna (saýda naryqtaryn uıymdastyrý boıynsha QR zańnamasyn buzý) sáıkes ákimshilik is qozǵaldy. Oǵan qosa áleýmettik mańyzy bar azyq-túlik taýarlaryn satyp alýǵa baılanysty zańsyz syıaqy (204-3-bap) talap etken taǵy eki kásipker jaýapqa tartyldy. Jyl basynan beri barlyǵy 192 kásipkerlik nysanyna ákimshilik is qozǵaldy, - dedi E.Qımatova.

Onyń aıtýynsha, BQO boıynsha bazarlardy jańartý jónindegi jol kartasyna bastapqyda «Kolos», «Mırlan», «Mıhaıl», «Ónim» bazary engizilgen edi. 2024 jyly buǵan ózgeris engizilip, taǵy 10-y engizildi. 

Qazirgi kezde «Sheber», «Áıtıevte», «Zemlıachka», «Ashyq jol» jáne «1100 usaq-túıek» bazarlarynda kúrdeli qurylys jumystary júrgizilýde. «Áıtıevte» jáne «Ashyq jol» bazary jeltoqsan aıynda paıdalanýǵa beriledi. Qalǵan úsheýiniń qurylysy 2026 jyldyń birinshi toqsanynda aıaqtalady. 

Departament basshysynyń málimdeýinshe, «Mıhaıl» bazary jóndelgennen keıin kóshede saýda jasaıtyn 47 jalǵa alýshy jyl sońyna deıin ǵımarat ishine kóshiriledi. Al «Mereı» bazary menshik ıesiniń saýda nysanyn satýyna baılanysty 2026 jylǵy 1 qańtardan bastap jabylady.

– «Mırlan», «Kolos», «Altyn Alma», «Baqyt jol» sııaqty bazarlarda jańǵyrtý jumystary konteınerlerdi, ashyq aspan astyndaǵy saýda qatarlaryn bólshekteý arqyly júzege asyrylady. «Aıgúl» jáne «Ónim» bazarynda jumystar kesteden keshiktirilýde. «Tulpar» ekonomıkalyq tıimsizdigine baılanysty jańǵyrtý júrgizýden bas tartyp otyr, - dep qosty E.Qımatova.

Eske sala keteıik, budan buryn Oral qalasyndaǵy dúkenderde tuz tapshylyǵy týyndaǵanyn jazǵan edik.