BQO-da azamattyq nekedegi kúıeýin óltirgen áıel 10 jylǵa sottaldy
ORAL. KAZINFORM — BQO qylmystyq ister jónindegi mamandandyrylǵan aýdanaralyq soty alqabılerdiń qatysýymen azamattyq nekedegi kúıeýin óltirgen áıelge qatysty QK-niń 99-babynyń 1-bóligine sáıkes qylmystyq iske núkte qoıdy.
BQO sotynyń baspasóz qyzmetinen málim etkenindeı, bıylǵy 3 qańtarda shamamen 18.00-de Terekti aýdany Tóńkeris aýylynda atalmysh turǵyn óz úıiniń as bólmesinde keshki as daıyndap júrgen.
Osy ýaqytta azamattyq nekedegi kúıeýi masań kúıinde úıge kelip, kıkiljiń shyǵaryp, onyń tamaǵynan qylǵyndyrǵan. Keıin qonaq bólmedegi dıvanǵa jatyp, áıeline qatysty balaǵat sózder aıtqan.
Budan keıin áıel kıkiljińdi sebep qylyp, pyshaqpen jábirlenýshiniń ómirine qaýipti, sol jaq keýde tusyna bir márte soqqy jasap, júregin zaqymdaǵan. Alǵan dene jaraqatynan er adam oqıǵa ornynda qaıtys bolǵan, al áıel úıden qashyp ketken.
— Jaza taǵaıyndaý kezinde sot jáne alqabıler sottalýshynyń is-áreketinde jaýaptylyq pen jazany jeńildetetin nemese aýyrlatatyn mán-jáılardyń joqtyǵyn eskerdi. Sot alqabılerdiń aıyptaý kesimin negizge alyp, asa aýyr qylmys jasaǵany úshin sottalýshyǵa 10 jyl merzimge bas bostandyǵynan aıyrý jazasyn taǵaıyndady. Úkim zańdy kúshine endi, — dep habarlady vedomstvodan.
Eske sala keteıik, budan buryn BQO-da sotpen aqtalǵan turǵyn 3 mln teńge óndirip alǵanyn jazǵan edik.
