BQO-da «Aıtystyń Sholpan juldyzy» atty óner básekesiniń jeńimpazdary anyqtaldy
Belgili aıtysker aqyn, Qazaqstannyń eńbek sińirgen mádenıet qyzmetkeri, oblysta til salasynda basshylyq qyzmet atqarǵan Sholpan Qydyrnııazovanyń 70 jasqa tolýyna oraı týǵan jeri - Qaratóbe aýdanynda mereıtoılyq sharalar aıasynda ótken dodaǵa barlyǵy 14 aqyn qatysyp, baq synady.
Qazylar alqasynyń tóraǵasy, aqyn, Qazaqstan Jazýshylar odaǵynyń múshesi Baýyrjan Halıollanyń aıtýynsha, Atyraý, Aqtóbe, Mańǵystaý óńirinen kelgen aıtyskerlermen birge jergilikti jas júırikter óner kórsetken óleń dodasy kópshiliktiń kóńilinen shyqty.
«Ásirese, Arǵynbek Qalbaev, Jánibek Beıbitov, Alshynbek Muhanǵalıev syndy kórshi aımaqtan kelgen jas aıtyskerler babynda eken. Aq Jaıyq óńiriniń namysyn qorǵaǵan aqyndar da aıanyp qalǵan joq. Aldy respýblıkaǵa tanylyp úlgergen aqyndarmen qatar, birazyn kópshilik jyǵa tanymasa da, óz ortasynda tóbe kórsetip júrgen jastar ózara syılasa otyryp, sóz qaǵystyrdy. Óz ónerlerin shyńdaı tússe, olardyń bolashaqta talaı alamannyń kórigin qyzdyratyny anyq», dedi Baýyrjan Halıolla.
Sonymen, mańǵystaýlyq Arǵynbek Qalbaev bas júldeni jeńip alsa, oraldyq Talǵat Myqı birinshi orynǵa ıe boldy.
Aqtóbelik Jánibek Beıbitov pen Aqjaıyq aýdanynyń túlegi Meıirman Shákenov ekinshi, atyraýlyq Alshynbek Muhanǵalıev, qaztalovtyq Estemis Muqambetov pen jańaqalalyq Orynbek Meńdiqulov úshinshi orynǵa kóterildi.
Qaratóbelik Raıymbek Ótepov pen oraldyq Ádil Ahmetovke Darıǵa Mushtanova men Úzildik Eleýbaeva atyndaǵy arnaıy syılyqtar berildi. Qalǵan aqyndarǵa kótermeleý syılyqtary tabys etildi.
Mereıtoı aıasynda Muhıt atyndaǵy mektepte Sholpan Qydyrnııazovanyń qazaq tili men ádebıeti kabıneti ashylyp, «Týǵan jerdiń tuǵyrynda túledim» atty ádebı-mýzykalyq kesh ótti.
Aıta keteıik, Sholpan Batyrqyzy osydan týra jetpis jyl buryn, 1949 jyly 6 mamyrda Qaratóbe aýdany Qarakól aýylynda dúnıege keldi.
1980 jyly respýblıkalyq aqyndar aıtysynda bas júldeni jeńip alǵan Sholpan Batyrqyzy aýdan jáne oblys kóleminde basshylyq qyzmetter atqardy.
Aqynnyń 70 jasqa tolýyna oraı sondaı-aq "Anadan - aqyl, ájeden - ádep" atty jańa kitaby jaryq kórdi.
