BQO-da áıeline qol jumsaǵan polıtsııa qyzmetkerine qatysty tergeý júrgizilýde
ORAL. QazAqparat – Batys Qazaqstan oblysynda áıeline qol jumsaǵan polıtsııa qyzmetkerine qatysty tergeý júrgizilýde, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, tergeý amaldaryn júrgizýge áleýmettik jelide jaryq kórgen jarııalanym sebep boldy.
Onda BQO polıtsııa departamenti patrýldik polıtsııa batalonynyń ınspektory, polıtsııa aǵa leıtenanty Haıdar Jeksenov pen onyń zaıyby Ásel Alqanovanyń arasynda 2019 jylǵy 23 qazanda bolǵan otbasylyq kıkiljiń deregi aıtylady.
Sol jyldyń 31 qazanynda Á.Alqanova kúıeýiniń ózine dene jaraqatyn keltirgeni jóninde oblystyq polıtsııa departamentine shaǵym túsirgen. Sodan keıin Á.Alqanovadan H.Jeksenovke talaby joq ekendigi týraly taǵy bir aryz túsip, tekserý toqtatylǵan.
Departament basshylyǵy ofıtserler jınalysynda H.Jeksenovke mundaı qylyqqa jol bermeý jóninde qatań eskertý jasaýmen shektelý týraly sheshim qabyldaǵan. Sonymen qatar onyń tikeleı basshysy mundaı derek qaıtalanǵan jaǵdaıda polıtsııa qyzmetkeriniń ishki ister organynan qýylatynyn qatań eskertken.
Óziniń 16 mamyr kúni áleýmettik jelige júgingenin Á.Alqanova H.Jeksenovtiń qazirgi ýaqytta keltirilgen zalaldy óndirýden bas tartýyna baılanysty dep túsindiredi. Sosyn jarııalanym shyqqannan keıin H.Jeksenov oǵan qońyraý shalyp, kúsh qoldanamyn dep qorqytqanyn aıtady.
«Qazirgi kezde QR QK 115-babyna (qorqytý) sáıkes tergeý amaldary bastaldy. Sondaı-aq qyzmettik tekserý júrgizilýde, onyń qorytyndysy keıin habarlanatyn bolady», dedi B.Belgibekov.
Eske sala keteıik, budan buryn BQO-da segiz adamnyń polıtsııa qyzmetkerlerine shabýyl jasaǵanyn jazǵan bolatynbyz.
