BQO-da áıelin kepildikke alǵan er adamnyń isi sotqa joldandy
ORAL. QazAqparat – Oralda áıelin kepildikte ustaǵan er adamnyń isi sotqa berildi, dep habarlaıdy QazAqparat tilshisi.
BQO Polıtsııa departamentiniń baspasóz qyzmetinen túsken málimetke qaraǵanda, oqıǵa erli-zaıypty Islamǵalıevterdiń ajyrasýyna baılanysty otbasylyq kıkiljińnen keıin bolǵan.
2019 jyly 28 qarasha kúni saǵat 13.10-da Erlan Islamǵalıev áıeli Iraıdanyń notarıaldyq keńsesinde ony pyshaqpen jáne granataǵa uqsas zatpen qorqytyp, kepildikke alǵan edi.
Polıtsııa qyzmetkerleriniń saýatty is-qımyly nátıjesinde tutqyndy bosatý kezinde arnaıy quraldar men atys qarýy qoldanylǵan joq. Alty saǵattan astam ýaqytqa sozylǵan kelissózden keıin E.Islamǵalıev áıelin bosatty. Keıin ózi ustaldy.
Departament bastyǵy Maqsuthan Ablazımovtyń aıtýynsha, taraptar bergen barlyq aıyptaýlar men dáleldemeler, otbasy tarıhy muqııat zerdelendi. Jábirlenýshi kúıeýin basqa da qylmystar jasaǵanyn aıtqan. Tergeý barysynda E.Islamǵalıevke QR Qylmystyq kodeksiniń birneshe baby boıynsha aıyp taǵyldy.
«Oblys prokýratýrasy zerdelegennen keıin aıyptaý aktisi bes bap (azaptaý, bopsalaý, kepildikke alý nemese kepil túrinde ustaý, óltiremin dep qorqytý jáne zorlaý) boıynsha bekitilip, is BQO qylmystyq ister jónindegi mamandandyrylǵan aýdanaralyq sotyna qaraýǵa joldandy», - dedi M.Ablazımov.
