BQO-da áıeli men eki kishkentaı qyzyn óltirgen turǵyn qamaýǵa alyndy
ORAL. QazAqparat – Batys Qazaqstan oblysynda áıeli men eki kishkentaı qyzyn óltirgen turǵyn qamaýǵa alyndy, dep habarlaıdy QazAqparat tilshisi.
BQO sotynyń baspasóz qyzmetinen túsken málimetke qaraǵanda, Tasqala aýdandyq sotynyń tergeý sýdıasy tergeýshiniń K-ny eki aıǵa qamaýǵa alý jónindegi ótinishin qanaǵattandyrdy.
Atalǵan turǵyn QR QK 99-baby 3-bóligine (asa qatygezdikpen eki nemese odan kóp adamdy óltirý, jas balany óltirý) jáne 202-baby 2-bóligi 1-tarmaǵyna (órt qoıý jolymen bótenniń múlkin qasaqana joıý nemese búldirý) sáıkes aıyptalyp otyr.
Budan buryn jazǵanymyzdaı, qaıǵyly oqıǵa Tasqala aýdany Aqtaý aýylynda 8 sáýirden 9-yna qaraǵan túnde boldy. Kúdikti órtep jibergen úıden onyń áıeli men eki kishkentaı qyzynyń denesi tabylǵan bolatyn. Sodan keıin ol ózine qol jumsamaq bolǵan.
BQO polıtsııa departamenti baspasóz qyzmetiniń naqtylaýynsha, qazirgi kezde 1986 jylǵy er adam aýrýhanada polıtsııa qyzmetkerleriniń kúzetýimen arnaıy palatada jatyr.
