BQO-da áıeldiń ólimi boıynsha tergeý júrgizilýde
ORAL. QazAqparat – Batys Qazaqstan oblysynda áıeldiń ólimi boıynsha tergeý júrgizilýde, dep habarlaıdy QazAqparat tilshisi.
BQO densaýlyq saqtaý basqarmasy málim etkenindeı, oqıǵa 3 qyrkúıek kúni Aqsaı qalasyna irgeles Araltal aýylynda oryn aldy.
Jasy 35-40 shamasyndaǵy áıel adam jedel járdem kelgenge deıin kóz jumdy.
Turǵyndardyń sózine qaraǵanda, er adam áıeldi óltirgeni jóninde polıtsııaǵa ózi habarlaǵan.
Bórli aýdany polıtsııa bólimi oqıǵanyń 3 qyrkúıek kúni túngi saǵat 03.09-de bolǵanyn, tolyq málimettiń keıin beriletinin jetkizdi.
Qazirgi kezde QR QK 99-baby 1-bólimine (adam óltirý) sáıkes qylmystyq is qozǵalyp, saraptamalar taǵaıyndalyp, tergeý amaldary júrgizilýde.
Eske sala keteıik, budan buryn oqýshyǵa seksýaldy sıpattaǵy áreketter jasaǵan Oral turǵyny ustalǵanyn jazǵan bolatynbyz.
