BQO-da áıeldi balǵamen urǵan zeınetker 8 jylǵa sottaldy
ORAL. QazAqparat - Búgin Batys Qazaqstan oblysynyń qylmystyq ister jónindegi mamandandyrylǵan aýdanaralyq soty «Adam óltirýge oqtalý» babymen aıyptalǵan Fedor Shaposhnıkovke úkim shyǵardy, dep habarlaıdy QazAqparat tilshisi.
Sot ony QR QK 24-baby 3-bóligi, 99-baby 1-bóligine sáıkes kináli dep tapty.
Sot tóraǵasy Qaırat Shalqarov málim etkendeı, oqıǵa bıylǵy 8 naýryz kúni saǵat 19.30 shamasynda Zelenov aýdany Mıchýrın aýylynda boldy.
Elvıra Tastemirova Shaposhnıkovpen birge turatyn áıeldi quttyqtaý úshin sol úıge keledi. Biraq áıel úıde bolmaı qalady da, Shaposhnıkovpen birge meıram qurmetine araq ishiledi. Sonyń barysynda Shaposhnıkov ózimen birge turatyn S.Sysolıatınaǵa ony ańdý jóninde habarlama jibergenin jeleý etip, áıeldiń aýzyna ishimdikti kúshtep quıa bastaıdy. Sodan keıin óltirý maqsatymen jábirlenýshiniń basynan balǵamen segiz márte uryp, ishinen tepkileıdi. Úıge júgirip kirgen R.Áýbákirov F.Shaposhnıkovtyń qolynan balǵany julyp alyp, qylmystyq áreketine tosqaýyl qoıady.
E.Tastemirova jedel járdem kóligimen Oral qalalyq kópbeıindi aýrýhanasyna jetkizilip, der kezinde kórsetilgen medıtsınalyq kómektiń arqasynda aman qalady.
«Sot 1948 jylǵy F.Shaposhnıkovtyń egde jasyn, ókinýin jáne densaýlyǵyn eskerip, oǵan QR QK 99-baby 1-bóligi boıynsha qarastyrylǵan eń tómengi jaza - 8 jylǵa bas bostandyǵynan aıyrý jazasyn qaýipsizdigi joǵary qylmystyq-atqarý júıesi mekemesinde óteýge úkim etti. Sonymen qatar zeınetker ekendigi eskerilip, 1 mln teńge kólemindegi moraldyq shyǵyn 800 myń teńgege túsirildi», - dedi QazAqparat tilshisine Q.Shalqarov.
Osyǵan deıin úıqamaqta bolǵan F.Shaposhnıkov sot zalynda qamaýǵa alyndy.
Úkim zańdy kúshine engen joq.
