BQO-da áıelderge qatysty 1 300-den astam qylmys tirkeldi

ORAL. KAZINFORM — Batys Qazaqstan oblysynda bıylǵy on aıda áıelderge qatysty 1 330 qylmys tirkeldi. 

BQO polıtsııa departamenti qoǵamdyq qaýipsizdik basqarmasynyń bastyǵy, polıtsııa podpolkovnıgi Oljas Ibraıymovtyń óńirlik kommýnıkatsııalar qyzmeti alańynda ótken brıfıngte málim etkenindeı, bul kórsetkish ótken jylǵy deńgeıden (1 273) asyp ketip otyr.

Onyń sózine qaraǵanda, sonyń ishinde 134-i otbasylyq-turmystyq qatynastar salasynda jasalǵan. Munyń bireýi adam óltirý (QR QK 99-baby) bolsa, úsheýi — densaýlyqqa qasaqana aýyr zııan keltirý (106-bap), tórteýi — aýyrlyǵy ortasha zııan keltirý (107-bap), 62-si — uryp-soǵý (109-1-bap), taǵy bireýi — qorqytý (115-bap).

— Sonymen qatar Ákimshilik quqyq buzýshylyq týraly kodeksiniń 73-babyna (otbasy-turmystyq qatynastar aıasyndaǵy quqyqqa qarsy áreketter) sáıkes 2 316 adam (2024 jyly osy merzimde — 2 441) ákimshilik jaýapkershilikke tartyldy. Sot arqyly 868 erekshe talap (900) belgilendi. Minez-qulyqqa qoıylǵan erekshe talaptardy buzýdyń 472 deregi (495) anyqtaldy. Oǵan qosa 2 464 qorǵaý nusqamasy (2 383) shyǵaryldy. Osy nusqamany buzǵany úshin 461-bapqa sáıkes 152 adam (141) ákimshilik jaza arqalady, — dedi Oljas Ibraıymov.

Onyń aıtýynsha, maskúnemdikke shaldyqqan 144 adam (137) májbúrlep emdeýge jiberilgen. Ýaqytsha beıimdeý jáne detoksıkatsııa ortalyǵyna jetkizilgen 14 046 adamnyń (13 295) 8 561-i (8 439) sonda ornalastyrylǵan.

Departament málimetine sáıkes Memleket basshysynyń tapsyrmasyna sáıkes bıylǵy qańtar aıynda ІІM júıesinde otbasylyq-turmystyq zorlyq-zombylyqpen kúres jónindegi mamandandyrylǵan bólimshe qurylǵan bolatyn. Qazirgi kezde departamentte osy bólimdegi shtat sany 44-ke jetkizilgen.

Eske sala keteıik, budan buryn BQO-da otbasyndaǵy zorlyq-zombylyq nelikten 3 esege kóbeıgenin jazǵan edik.