BQO-da avtojol salasynda 271 mln teńge negizsiz jumsalǵan

ORAL. KAZINFORM – Batys Qazaqstan oblysynda avtomobıl joldaryn pasporttaý júrgizilmegen.

QR Sybaılas jemqorlyqqa qarsy is-qımyl agenttigi BQO boıynsha departamenti preventsııa basqarmasynyń basshysy Birjan Haırýllınniń málim etkenindeı, sonyń saldarynan avtomobıl joldaryn salý jáne jóndeý jumystary júıesiz atqarylýda.

Birjan Mardanulynyń sózine qaraǵanda, mysaly, Oral qalasynda Abaı, Nazarbaev dańǵyldary men Saraıshyq kóshesi sońǵy jyldary birneshe ret jóndelgen. Al E.Toqsanov, T.Jarokov jáne Preobrajenskaıa kósheleriniń joldaryna keıingi 20 jylda birde-bir jóndeý jasalmaǵan.

- 2019 jyldan beri jergilikti atqarýshy organdardyń tapsyrysymen avtomobıl joldary boıynsha 195 jobalyq-smetalyq qujattama daıyndalǵan. Alaıda sonyń 68-i júzege aspaı qalǵan, qazir bulardy qoldaný merzimderi ótip ketken. ıAǵnı bıýdjettiń 271,2 mln teńgesi negizsiz jumsalǵan, - deıdi B.Haırýllın.

Onyń aıtýynsha, óńirde ortasha jóndeýge arnalǵan JSQ bola tura, kúrdeli jóndeýge jańadan jobalyq-smetalyq qujattama jasaý derekteri de tirkelip otyr. Atap aıtqanda, 2021 jyly Bókeı ordasy aýdanynda Muratsaı aýylyna kireberis jolǵa ortasha jóndeýge 1,8 mln teńgege jobalyq-smetalyq qujattama daıyndalǵan. Keıin kúrdeli jóndeýge qaıtadan qujattama jasaldy. Osyǵan uqsas jaǵdaı Kaztalov aýdany Bespishen-Qoshankól-Qaraoba jolyn jóndeý barysynda oryn aldy. Munda ortasha jóndeý jobasyn ázirleýge 1,3 mln teńge bıýdjet qarjysy jumsalǵan. Keıin kúrdeli jóndeýge qaıtadan qujattar daıyndalǵan.

- Jasalǵan jobalyq-smetalyq qujattamalardyń der kezinde júzege asyrylmaýynyń negizgi sebebi – qala men aýdan ákimdikteriniń máseleni tolyq qadaǵalamaýy dep esepteımiz, - deıdi B.Haırýllın.

Eske sala keteıik, budan buryn Oralda byltyr jóndelgen joldyń opyrylyp qalýyna baılanysty ákimdik jaýap bergenin jazǵan edik.