BQO-da avtomobıl júk kóligimen soqtyǵysyp, júrgizýshi qaza tapty
ORAL. QazAqparat - Batys Qazaqstan oblysynda avtomobıl júk kóligimen soqtyǵysyp, júrgizýshi qaza tapty, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa 9 mamyr kúni shamamen saǵat 01.15 shamasynda Báıterek aýdanynda oryn aldy.
Darııan aýylynyń turǵyny «VAZ-2170» avtokóligimen kele jatyp, Oral-Kırsanov jolynyń 15-shaqyrymynda, Volodar aýylynyń tusynda qarsy betke shyǵyp ketken. Sóıtip 1958 jylǵy azamat aıdap kele jatqan «DAF CF» júk kóligimen soqtyǵysýǵa jol bergen.
Sonyń saldarynan jeńil kóliktiń júrgizýshisi oqıǵa ornynda qaza tapty.
«Qazirgi kezde atalǵan oqıǵa boıynsha qajetti tergeý amaldary júrgizilýde», dep habarlady QazAqparat tilshisine oblystyq polıtsııa departamentiniń baspasóz qyzmetinen.
Oblystyq TJ departamentiniń baspasóz qyzmetinen alynǵan málimet boıynsha oqıǵa ornynda saǵat 02.08-de bolǵan qutqarýshylar (4 adam, 1 tehnıka) 2001 jylǵy júrgizýshiniń dene bólikterin jınap alǵan. Júk kóliginiń júrgizýshisi zardap shekpegen.
Eske sala keteıik, budan buryn Oralda birneshe kólik soqtyǵysyp, úsh adamnyń jaraqat alǵanyn jazǵan bolatynbyz.
