BQO-da avtokólikke masań kúıde otyrǵan aýyl ákimi qyzmetinen bosatyldy
ORAL. KAZINFORM — Memlekettik qyzmet isteri agenttiginiń BQO-daǵy ádep jónindegi keńes otyrysynda memlekettik qyzmetshilerdiń tártiptik isteri qaraldy.
Memlekettik qyzmet isteri agenttigi BQO boıynsha departamentiniń málimetine qaraǵanda, Aqjaıyq aýdany Chapaev aýyldyq okrýginiń ákimi Bıbolat Zeınýllın bıylǵy 12 naýryzda QR Ákimshilik quqyq buzýshylyq týraly kodeksiniń 608-baby 1-bóligine (kólik quralyn masań kúıde basqarý) sáıkes ákimshilik jaýapkershilikke tartylǵan. Bul týraly sot qaýlysy shyǵarylyp, kúshine engen.
Osylaısha, B.Zeınýllın memlekettik qyzmetshi ári basshylyq laýazymda bola tura, ádep normalarynyń buzylýyna jol bergen. Oǵan qosa atalǵan aýyl ákimi ótken jyly qazan aıynda belgili bir tulǵaǵa artyqshylyq kórsetkeni úshin qyzmetine tolyq sáıkes emestigi týraly eskertý túrindegi tártiptik sharaǵa tartylǵan bolatyn. Sol sebepti qaıtadan teris qylyqqa barǵan B.Zeınýllındi qyzmetinen bosatý týraly sheshim qabyldandy.
Sondaı-aq Oral qalasy jumyspen qamtý jáne áleýmettik baǵdarlamalar bóliminiń basshysy Erbolat Kárimovke qyzmetine tolyq sáıkes emestigi týraly eskertý berý usynyldy. Ol qıyn ómirlik jaǵdaıda qalǵan adamdardy qaıta áleýmettendirý ortalyǵy dırektory laýazymyna biliktilik talaptaryna sáıkes kelmeıtin, oǵan qosa sottylyǵy tolyq ótelmegen adamdy konkýrstan tys taǵaıyndap, eńbek shartyn jasasqan.
Eske sala keteıik, budan buryn BQO-da sessııa otyrysynda daýys kótergen aýyl ákimine qatań sógis berilgenin jazǵan edik.
Sondaı-aq BQO-da 21 memlekettik qyzmetshi teris sebeptermen jumysynan bosatyldy.
