BQO-da avtokólik aýdarylyp, eki adam kóz jumdy

ORAL. KAZINFORM — Batys Qazaqstan oblysy Terekti aýdany Shalqar kóli mańynda jol apaty boldy.

BQO polıtsııa departamentiniń baspasóz qyzmetinen málim etkenindeı, oqıǵa 15 shilde kúni saǵat shamamen 18.50-de Tasanshegen-Saryómir jolynyń 18-shaqyrymynda Bozaı aýyly tusynda boldy. 

— Hyundai Solaris avtokóliginiń júrgizýshisi rólge ıe bola almaı, aýdarylǵan. Jol apaty saldarynan júrgizýshi men jolaýshy oqıǵa ornynda jan tapsyrdy. Taǵy bir jolaýshy aýrýhanaǵa jatqyzyldy. Qazirgi kezde qylmystyq is qozǵalyp, tergeý amaldary júrgizilýde. BQO polıtsııa departamenti júrgizýshilerge jol erejesin saqtap, barynsha abaı bolý kerektigin eske salady, — dep habarlady vedomstvodan.

Turǵyndardyń sózine qaraǵanda, jeńil kólikte úsh qyz bolǵan. 

Eske sala keteıik, budan buryn Batys Qazaqstanda joldy kútip ustamaǵany úshin 66 laýazymdy qyzmetkerdiń jaýapqa tartylǵanyn jazǵan edik.