BQO-da avtokólikterdiń jaıaý júrginshini qaǵyp ketýi jıiledi
ORAL. QazAqparat - Batys Qazaqstan oblysynda avtokólikterdiń qarańǵy ýaqytta jaıaý júrginshini qaǵyp ketýi jıiledi, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, adam ólimine soqtyrǵan qos birdeı oqıǵa oryn aldy.
18 mamyr kúni shamamen saǵat 04.30-da belgisiz bireý Oral-Atyraý joly boıynda Bogatsk aýyly tusynda 1995 jylǵy jaıaý júrginshini avtokóligimen qaǵyp ketip, oqıǵa ornynan boı tasalaǵan.
Júrginshi sol jerde qaza tapqan.
Báıterek aýdany polıtsııa bólimi júrgizgen izdestirý sharalary barysynda jol-kólik oqıǵasyn jasaǵan kúdikti anyqtaldy. Ol Oral qalasynyń 1979 jylǵy turǵyny bolyp shyqty.
Sol sekildi 25 mamyr kúni shamamen saǵat 23.00-de Samara-Shymkent joly boıynda Terekti aýdany Jańaómir aýyly tusynda «Toıota Haılıýks» avtkóliginiń 1959 jylǵy júrgizýshisi 1970 jylǵy júrginshini qaǵyp ketken. Ol da oqıǵa ornynda mert boldy.
Atalǵan derekter boıynsha QR QK 345-baby 3-bóligine sáıkes (abaısyzda adam ólimine soqtyrǵan jol qozǵalysy erejesin buzý) sotqa deıingi tergeý amaldary júrgizilýde.
