BQO-da avtokólik 4 jylqyǵa soǵylyp, 5 adam aýrýhanaǵa jetkizildi

ORAL. QazAqparat – Batys Qazaqstan oblysynda «Volkswagen Sharan» avtokóligi 4 jylqyǵa soqtyǵysyp, 5 adam aýrýhanaǵa jetkizildi, dep habarlaıdy QazAqparat tilshisi.

BQO TJD baspasóz qyzmetinen málim etkendeı, oqıǵa 9 qyrkúıek kúni saǵat 6:50-de Aqjaıyq aýdany aýmaǵynda boldy.

«Oral-Atyraý jolynyń 85-shaqyrymynda Samal aýyly tusynda «Volkswagen Sharan» avtokóligi jylqylardy qaqqan. Saldarynan túrli jaraqat alǵan 5 adam qutqarylyp, Aqjaıyq aýdandyq ortalyq aýrýhanasyna jetkizildi. Olardyń ekeýi – úsh aılyq jáne bir aılyq sábıler. Sondaı-aq, 1979 jylǵy júrgizýshi, 1983 jylǵy áıel men 2001 jylǵy qyz zardap shekti», - dep habarlady vedomstvodan.

Oqıǵa ornyna barǵan trassalyq-medıtsınalyq qutqarý beketi qyzmetkerleriniń sózine qaraǵanda, jylqynyń bári de ólgen. Zardap shekkenderdiń jaǵdaıy anyqtalý ústinde.

Eske sala keteıik, budan buryn BQO-da avtokóliktiń júrgizýshisimen birge janyp ketkenin jazǵan bolatynbyz.