BQO-da avtobýs júrgizýshileri úsh kúnde 271 ret jol erejesin buzǵan
ORAL. QazAqparat – Batys Qazaqstan oblysynda «Avtobýs» jedel aldyn alý is-sharasy aıasynda úsh kúnde avtobýs júrgizýshileriniń 271 quqyqbuzýshylyqqa jol bergeni anyqtaldy, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkenindeı, sonyń ishinde 56 júrgizýshi burylý erejesin buzǵan.
Jeti júrgizýshi jyldamdyqty shekten tys arttyrsa, 11-i tehnıkalyq baıqaýdan ótpegen.
Sonymen qatar avtobýs parkteriniń laýazymdy qyzmetkerleri de ákimshilik jaýapkershilikke tartyldy.
Júrgizýshiler arasynda tártipti nyǵaıtý maqsatynda 20-22 qańtar aralyǵynda respýblıka aýmaǵynda ótkizilgen «Avtobýs» is-sharasy kezinde jergilikti oryndarda birlesken mobıldi toptar qurylyp, jumys istedi.
Reıdtik tekserýler barysynda jolaýshylardy jasyryn tasymaldaýmen aınalysqan 7 júrgizýshige qatysty QR Ákimshilik quqyqbuzýshylyq kodeksiniń 463-babyna sáıkes hattama toltyryldy.
Óreskel derek Oral qalasynda tirkelip, bir baǵytta júretin eki avtobýs júrgizýshisiniń kólikti mas kúıinde aıdaǵany anyqtaldy. Abyroı bolǵanda, budan eshkim zardap shekken joq. Olarǵa ákimshilik yqpal etý sharalary qoldanylyp, avtokólikter arnaıy turaqqa qoıyldy.
Barlyǵy 150-den astam avtobýstyń jylytý júıesi, elektr jabdyqtary jáne basqa tehnıkalyq jaı-kúıi tekserildi.
Eske sala keteıik, budan buryn Oralda avtobýs júrgizýshileriniń esirtkige eltigen kúıinde rýlge otyrǵanyn jazǵan bolatynbyz.
