BQO-da «Aýyldyq densaýlyq saqtaýdy jańǵyrtý» jobasy aıasynda 50 nysan salynbaq
BQO qurylys basqarmasynyń basshysy Álibek Antazıevtiń málim etkenindeı, Memleket basshysynyń tapsyrmasy boıynsha óńirde eldi mekenderde eki jyl ishinde alǵashqy medıtsınalyq-sanıtarlyq kómek nysandary (dárigerlik ambýlatorııa, feldsherlik-akýsherlik pýnkt, medıtsınalyq pýnkt) boı kóteretin bolady.
Onyń sózine qaraǵanda, bıyl 24 nysan qurylysyn bastaý josparlanǵan. Sonyń ishinde 12-siniń qurylys-montajdaý jumystaryn júrgizýge respýblıkalyq bıýdjetten 3,6 mlrd teńge bólinip, merdigerleri anyqtaldy. Qazirgi tańda qurylys bastalyp jatyr.
Sondaı-aq 2 medıtsınalyq nysan boıynsha respýblıkalyq bıýdjetten qarjylandyrýǵa bıýdjettik ótinim joldanyp, jergilikti qazyna esebinen konkýrstyq rásimderi júrgizilýde. Úsh etalondyq joba saraptamadan ótkizilýde. Qalǵan 7 joba boıynsha jobalaý-smetalyq qujattama jasalady.
Sonymen qatar 2024 jylǵa josparlanǵan 26 nysan boıynsha jer telimderi tolyǵymyn rásimdeldi, sáýlet-josparlaý tapsyrmasy men tehnıkalyq sharttar alý baǵytynda jumystar júrgizilýde.
«Aýyldyq densaýlyq saqtaýdy jańǵyrtý» pılottyq ulttyq jobasy aıasynda oblysta qos birdeı aýdanaralyq aýrýhana salynǵaly otyr. Atap aıtqanda, Kaztalov aýdandyq aýrýhanasy ǵımaratyn qaıta jańartý boıynsha konkýrstyq jumystar aıaqtaldy. Jobalaýshy mekeme – «Promenergoproekt» JShS. Kelisimshart quny – 31,013 mln teńge. Sol sekildi Aqsaı qalasynda Bórli aýdandyq aýrýhanasy ǵımaratynda qosymsha qurylys salýdyń da jobalaýshy mekemesi anyqtaldy. «GRADOPROEKT» JShS-men 31,377 mln teńgege kelisimshart jasaldy. Eki nysan boıynsha da jobalaý merzimi – 6 aı. Jyl sońyna deıin jobany jasaqtap, qurylys jumystaryn 2024 jyly bastaý kózdelip otyr», dedi Álibek Antazıev.
Eske sala keteıik, budan buryn Batys Qazaqstanda bıyl úsh mekteptiń qurylysy aıaqtalatynyn jazǵan edik.