BQO-da aýyl turǵyny kıik múıizderimen ustaldy
ORAL. QazAqparat – Batys Qazaqstan oblysynda aýyl turǵyny kıik múıizderimen ustaldy, dep habarlaıdy QazAqparat tilshisi.
«Ohotzooprom» ÓB» RMQK-dan túsken málimetke qaraǵanda, oqıǵa 9 sáýir kúni Bókeı ordasy aýdany aýmaǵynda bolǵan.
«Ohotzooprom» ınspektorlary Bókeı ordasy aýdandyq polıtsııa bólimi, QR UQK Jánibek aýdandyq bólimi ókilderimen birlesken reıd júrgizgen kezde Bısen aýyldyq okrýgi Begaly qystaǵy mańynan 16 dana kıik múıizi tabylyp, tárkilendi.
Osy qylmysqa kúdikti retinde Bısen aýylynyń turǵyny ustaldy.
Qazirgi kezde QR QK 339-baby 1-bóligine (ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sáıkes qylmystyq is qozǵalyp, tergeý amaldary júrgizilýde.
Aıta keteıik, bul bap boıynsha aıypty dep tanylǵan adam múlki tárkilenip, úsh myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna, ne segiz júz saǵatqa deıingi merzimge qoǵamdyq jumystarǵa tartýǵa, ne úsh jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrýǵa jazalanady. Sondaı-aq belgili bir laýazymdardy atqarý nemese belgili bir qyzmetpen aınalysý quqyǵynan bes jylǵa deıingi merzimge aıyrylady.
