BQO-da aýyl turǵyndaryna qus sharýashylyǵyn damytýǵa qoldaý kórsetilýde
Óńirde «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasynyń «Eńbek balapan» jobasy aıasynda qaıtarymsyz grantqa qol jetkizgen aýyl adamdary óz isin damyta alady.
Ol úshin ár úmitker «Bıznes bastaý» baǵdarlamasy arqyly tegin oqý kýrsynan ótip, sertıfıkat alady. Sodan keıin bıznes josparyn jasap, arnaıy komıssııaǵa tapsyrady. Komıssııa maquldaǵan jaǵdaıda 200 AEK kóleminde qaıtarymsyz nesıege qol jetkizedi. Bul – jumyssyz aýyl turǵyndary úshin úlken qoldaý. «Eńbek balapan» jobasyn júzege asyrýǵa oblysta 625 mln teńge qarastyrylǵan.
24 maýsym kúni osy baǵdarlama aıasynda Báıterek aýdany Mıchýrın aýylynda grantqa ıe bolǵan 14 otbasyna mekıender men etti baǵyttaǵy balapandar tabys etildi.
Oblystyq kásipkerler palatasynyń dırektory Baqdáýlet Ibraıymovtyń aıtýynsha, buǵan deıin Terekti jáne Shyńǵyrlaý aýdandarynda turǵyndar osyndaı qoldaýǵa ıe bolǵan edi.
Mundaǵy maqsat – jumyssyzdyq deńgeıin tómendetý baǵytynda aýyl turǵyndarynyń óz kásibin ashýyna járdemdesý. Grant ıeleri qaıtarymsyz nesıege balapandardy satyp alyp, kútip-baptap, sosyn etke ótkize alady. Sodan keıin túsken qarjyǵa óz sharýashylyǵyn odan ári damyta alady. Osy oraıda ár aýdanda qus sharýashylyǵymen aınalysatyn operator anyqtalyp, ol turǵyndarǵa kómek kórsetedi. Olar qus etterin kóterme baǵamen satyp alyp, aýdandaǵy áleýmettik mekemeler ashanalary men dúkenderge ótkizedi. Turǵyndar da jergilikti sapaly ári tabıǵı ónimmen qamtylady.
Báıterek aýdandyq jumyspen qamtý ortalyǵynyń dırektory Alekseı Gerasımovtiń sózine qaraǵanda, bıyl osy aýdanda quny 48 mln teńgege baǵalanǵan 808 grant usynylmaq. Kúni búgin 43 aýdan turǵyny qaıtarymsyz nesıe alyp úlgerdi.
«Búgin aýdandaǵy az qamtylǵan, kóp balaly otbasylar men óz kásibin ashqysy keletin jastarǵa arnaıy sertıfıkattar tapsyryldy. Olardyń árqaısysyna 100 dana etti baǵyttaǵy balapandar men jumyrtqa tabatyn 57 mekıen berildi. Sondaı-aq quny 505,6 myń teńgeni quraıtyn nesıe esebinen tońazytqysh, qorshaýǵa arnalǵan tor, jem úlestirildi. Qalǵan aqshaǵa (200 myńdaı teńgege) kásip ıesi taǵy da jem, qosymsha úırek-qaz balapandaryn satyp alyp, qora sala alady. Bylaısha aıtqanda, eń aldymen aýylda jumyssyz júrgender azaısa, ekinshiden, turǵyndar qusty ósirip, saýdalap, tabys taýyp qana qoımaı, ári qaraı damyta alady», dedi A.Gerasımov.
Joba budan keıin de jalǵasyn tabady.
Eske sala keteıik, budan buryn qus sharýashylyǵyn damytýǵa BQO-da 1200-ge jýyq grant bólinetinin jazǵan bolatynbyz.
