BQO-da aýyl sharýashylyǵyndaǵy ınvestıtsııa kólemi bes esege ósti
ORAL. QazAqparat - Batys Qazaqstan oblysynda aýyl sharýashylyǵy salasyndaǵy ınvestıtsııa kólemi bes esege ósti, dep habarlaıdy «QazAqparat» tilshisi.
Oblys ákimi Altaı Kólginovtiń aıtýynsha, ótken jylǵy jeti aıda bul salaǵa 354 mln teńge salynsa, bıyl 2 mlrd teńgege jetti. Mysaly, óńirde qýattylyǵy jylyna 7 myń tonna et óndiretin jańa qus fabrıkasy, iri qara jáne usaq mal terisin óńdeıtin zaýyt, makaron fabrıkasy salynýda.
Jalpy, agroónerkásip keshenin damytý maqsatynda 7,2 mlrd teńge demeýqarjy bólinip otyr.
Elbasy aýyl sharýashylyǵy salasynda jańa egis alqaptaryn ıgerý, paıdalanylmaı jatqan jerlerdi qaıtarý, óndiris jáne tutyný kooperatıvterin qurý, veterınarlyq qaýipsizdikti kúsheıtý, sýlandyrý qurylystaryn qaıta qalpyna keltirý, AÓK ónimderiniń kólemi men óńdeý sapasyn arttyrý týraly naqty tapsyrma bergen bolatyn. Osy oraıda aýyl sharýashylyǵy ónimderiniń kólemi 0,6 paıyzǵa ósip, 56 mlrd teńgege jetti. Ósimdik sharýashylyǵynda egis alqaby jarty mıllıon gektardy qurasa, sonyń teń jartysy - dándi daqyldar. Bıyl eginnen alynatyn ónim ótken jylǵydan (309,8 myń tonna) 10 paıyzǵa artyq bolady dep boljanýda.
Kúni búgin 42 kooperatıv qurylyp, onyń 31-i jıyrmadan astam músheni biriktirip otyr. Jyldyq jospar artyǵymen oryndaldy. Aýdan ákimderiniń aldynda kooperatıvterdi qajetti tehnıkamen, resýrstarmen jáne ınfraqurylymmen qamtamasyz etý máselesi tur. Munyń basym bóligi agrobıznesti qoldaýǵa baǵyttalǵan memlekettik baǵdarlamalar aıasynda qamtylady.
Sýarmaly alqaptar eki esege artyp, 72 myń gektar (2016 jyly - 32 myń ga) boldy. Bıyl jalpy qúny 800 mln teńgege alty birdeı sýarmaly qurylys qalpyna keltirilýde. Aldaǵy besjyldyqta josparlanyp otyrǵan qurylys nysandaryn iske qosý sýarmaly jerlerdiń kólemin 145 myń gektarǵa deıin arttyrýǵa múmkindik beredi.
Agroónerkásip kesheni ónimderin qaıta óńdeý kólemin arttyrý boıynsha da jumystar júrýde. Máselen, ıran kásipkerlerimen tyǵyz qarym-qatynas ornatylyp, 1500 tonna qoı etin eksporttaý jóninde kelisim jasaldy. Búginde sonyń alǵashqy partııasy (20 tonna) jóneltildi.
Aıta keteıik, jeti aıdyń ishinde jaqyn jáne alys shetelderge 21 myń tonna astyq (bul 2016 jylǵy deńgeıden 4 esege kóp) jáne 20 myń tonna bıdaı (2016 jylǵy deńgeıden 2,2 esege artyq), sondaı-aq 1 myń tonnadan artyq et jáne et ónimderi (15,3 paıyzǵa kem) eksporttaldy.
