BQO-da «Aýyl» partııasynyń ókili saılaýshylarmen kezdesti

ORAL. QazAqparat – «Aýyl» partııasynyń ókili, oblystyq máslıhattyń depýtaty Temirǵalı Eskendirov Báıterek aýdanyndaǵy saılaýshylarymen kezdesti, dep habarlaıdy QazAqparat tilshisi.

Temirǵalı Qarataıuly – óńirge tanymal kásipker, «Jaıyq et» JShS kompanııalar tobynyń, «Agroprodýkt», «Jaıyq Agro LTD» JShS quryltaıshysy.

Oblystyq máslıhat depýtaty T.Eskendirov saılaýshylar aldynda atqarylǵan jumystar jaıynda esep berip, alda turǵan maqsat-mindetterdi de atap kórsetti.

Aýyl sharýashylyǵyn damytýǵa súbeli úlesin qosyp kele jatqan kásipker úsh baǵytta jumystanyp keledi. Sonyń biri – egin sharýashylyǵy. 20 myń gektardaı alqapqa dándi daqyldar egilse, ekinshiden, qus ósirý de qolǵa alynǵan. Úshinshi baǵyt – et ónimderin óndirý. Sonyń ishinde konservileý jáne shujyq tsehtary, shujyq óndirýge arnalǵan qasaphana zamanaýı jáne joǵary tehnologııalarmen jabdyqtalǵan. Osyndaı kásiporyndarda 800-deı adam jumyspen qamtylǵan.

Temirǵalı Eskendirov qaıyrymdylyq sharalarynan da qalys qalǵan emes. Aıtalyq, koronavırýs indetimen kúres kezinde 100 otbasyǵa jemi, tamaǵymen 3 myń balapan berildi. Barlyǵy 7 mln-daı teńgeniń qaıyrymdylyq kómegi jasaldy.

Kezdesýde sharýa qojalyqtarynyń ókilderi saladaǵy túıtkildi jaıttardy qozǵady. Oblystyq máslıhat depýtaty osy oraıda respýblıka kóleminde sheshilýi tıis ózekti máselelerdi «Aýyl» partııasynyń tóraǵasy, senator Álı Bektaevqa jetkizip, parlament qabyrǵasynda qozǵaýǵa bolatynyn aıtty.

«Sharýa qojalyqtaryna sýbsıdııa berý, aýyl sharýashylyǵy mamandaryn jergilikti jerde turaqtandyrý, tozyp turǵan nemese bala sany kóp aýyl mektepterin kúrdeli jóndeý nemese qaıta salý jáne basqa kókeıkesti máselelerdi sheshý úshin aldaǵy ýaqytta da birlesip jumystanatyn bolamyz», dedi T.Eskendirov.