BQO-da «Aýyl» partııasy dárigerlerge kómek kórsetti

ORAL. QazAqparat – Batys Qazaqstan oblysynda «Aýyl» halyqtyq-demokratııalyq patrıottyq partııasynyń músheleri indetpen kúresken dárigerlerdiń balalaryna qolushyn sozdy, dep habarlaıdy QazAqparat tilshisi.

Dástúrli «Mektepke jol» sharasy aıasynda oblys ortalyǵynda Oral qalalyq kópbeıindi aýrýhanasynda jumys isteıtin medıtsına qyzmetkerleriniń mektep tabaldyryǵyn alǵash attaǵaly otyrǵan búldirshinderine qajetti qural-jabdyqtar tapsyryldy.

«Aýyl» partııasy BQO fılıalynyń tóraǵasy Mynataýbıik Ánesov pen oblystyq máslıhat depýtaty, «Jaıyq et» kásipornynyń basshysy Temirǵalı Eskendirov koronavırýspen kúreste aq jeleńdi jandardyń eńbegi zor ekendigin atap kórsetti.

«Aldyńǵy shepte júrgen dárigerlerimiz qandaı qurmetke de laıyq. Olardyń barlyǵyna myqty densaýlyq tileımiz. Jasalyp jatqan jumystardyń nátıje berýi úshin aýyrmaıtyn jol izdep, saqtyq sharalaryn buljytpaı saqtaý ár adamnyń mindetine aınalýy tıis. Al jetkinshekterdiń bolashaqta elimizdiń maqtanyshy bolyp, memleketimizdiń damýyna úles qosatyn myqty azamat atanýyna tilekshimiz. Ol úshin jaqsy oqý kerek», dedi M.Ánesov.

Partııa belsendileriniń qoldaýymen on oqýshyǵa mektep sómkeleri alynyp, olar qalam-qaǵaz, dápter, túrli boıaýlar, ermeksaz, syzǵyshtan bastap túrli quraldarmen qamtyldy.

M.Ánesovtiń aıtýynsha, «Jaıyq et» kásiporny ókilderiniń qatysýymen sondaı-aq Derkól aýylyndaǵy №12 mektepte kóp balaly jáne az qamtylǵan otbasylardyń segiz balasyna kómek kórsetildi.

Qaıyrymdylyq sharasy Báıterek aýdany Şapov aýylyndaǵy B.Momyshuly atyndaǵy mektepte jalǵasyp, munda da ustazdar atyna jyly tilekter aıtylyp, jańa oqý jylynda balalardyń alańsyz bilim alýy úshin barynsha járdem berildi.

«Aýyl» partııasy budan bylaı da osyndaı izgilikti isterge atsalysatyn bolady.

Eske sala keteıik, budan buryn Batys Qazaqstanda 5824 adamnyń koronavırýs indetinen jazylyp shyqqanyn jazǵan bolatynyz.