BQO-da aýyl mektebin jańbyrdan keıin sý basty
Áleýmettik jelide taraǵan vıdeonyń avtory Aqjaıyq aýdany Taıpaq aýylyndaǵy Y.Altynsarın mektebin keshegi jańbyrdan keıin sý basqanyn kórsetip, shuǵyl kómek suraǵan.
BQO Bilim basqarmasynan málim etkenindeı, atalmysh mektep kúrdeli jóndeýdi qajet etedi. Qazirgi tańda qurylys-montajdaý jumystaryn júrgizýge Aqjaıyq bilim berý bólimi men «Tasqala Trans Gaz» JShS kelisimshart jasasqan. Merdiger mamyr aıynda kúrdeli jóndeý jumystaryn bastaıdy.
Aqjaıyq bilim berý bóliminiń basshysy Birjan Sabyrovtyń túsindirýinshe, mekteptiń ashana jáne sport zalyna sý kirgen.
Onyń aıtýynsha, mektep ǵımaraty ótken jyly kúrdeli jóndeýden ótýi tıis edi. Memlekettik satyp alý konkýrsy nátıjesinde «Tasqala Trans Gaz» JShS jeńimpaz dep tanylǵan bolatyn. Alaıda BQO Іshki memlekettik aýdıt departamenti tekserý júrgizip, sonyń nátıjesinde ekinshi turǵan mekeme jeńimpaz bolyp shyqty. Buǵan «Tasqala Trans Gaz» JShS kelispeı, sotqa berdi. Aqyry sot sheshimimen atalǵan JShS qaıtadan jeńimpaz bolyp tanyldy. Áıtse de jyl sońy bolǵandyqtan, qarjyny keri qaıtarýǵa týra kelgen.
«Bıyl «Aýyl – el besigi» jobasy aıasynda mektepti kúrdeli jóndeýge 300 mln astam teńge bólindi. Qosymsha qarjy jergilikti bıýdjetten qarastyrylady. Mektep oqýshylary endi Aqjaıyq agrotehnıkalyq kolledjiniń (burynǵy Taıpaq kolledji) bos turǵan ǵımaratyna kóshirilip, sonda bilim alatyn bolady», - dedi QazAqparat tilshisine B.Sabyrov.
Eske sala keteıik, budan buryn Batys Qazaqstan oblysynda tórt adamǵa qasqyr shapqanyn jazǵan bolatynbyz.