BQO-da aýyl kásipkerlerine 600 mln teńge berilmek
ORAL. QazAqparat - Búgin «WestKazInvest-2017» IV halyqaralyq ınvestıtsııalyq forýmy barysynda «Aýyl sharýashylyǵyn qarjylaı qoldaý qory» AQ, Batys Qazaqstan oblysynyń ákimdigi jáne «Atameken» UKP arasyndaǵy yntymaqtastyq týraly memorandýmǵa qol qoıyldy, dep habarlaıdy «QazAqparat» tilshisi.
Atalǵan memorandým BQO aýyldary men monoqalasynda shaǵyn kásipkerlik nysandaryna qoldaý kórsetýdi kózdeıdi. Kelisim aıasynda 600 mln teńge kóleminde shaǵyn nesıeler berilmekshi.
«Shaǵyn nesıeleýge qor tarapynan 300 mln jáne BQO ákimdigi tarapynan 300 mln teńge bólinip otyr. Bul qarajat sharýa jáne fermerlik sharýashylyqtarǵa, jeke kásipkerlerge shaǵyn jáne orta bıznesti nesıeleýge baǵyttalady. Nesıe berý sharttary óte qolaıly: jańa bızneske 5 mln teńgege deıin nesıeler, burynnan bar bıznesti keńeıtý úshin 8 000 AEK-ke deıin nesıe beriletin bolady. Nesıe merzimi - 4,5 jylǵa deıin, paıyzdyq mólsherlemesi - 6 paıyz, jyldyq tıimdi syıaqy mólsherlemesi 6,7 paıyzdan aspaıdy, - dedi «Aýyl sharýashylyǵyn qarjylaı qoldaý qory» AQ basqarmasy tóraǵasynyń orynbasary Baqyt Qudasbaeva.
Aıta keteıik, Batys Qazaqstan oblysynda atalmysh qordyń qatysýymen 25 (munyń 22-si et, úsheýi sút baǵytyndaǵy) aýyl sharýashylyǵy kooperatıvi quryldy. Olar 1093 shaǵyn sharýashylyqty biriktirip otyr. Qazirgi tańda 6 batysqazaqstandyq kooperatıv 90,5 mln teńge, kooperatıvke kirgen 660 sharýashylyq 1 mlrd 980 mln teńge kóleminde nesıe aldy. Qor qarajatynyń kómegimen modýldik mal soıý jáne sút qabyldaý beketteri, 2,6 myńnan astam mal basy satyp alyndy.
