BQO-da aýyl ákimi bolýǵa 289 úmitker nıet bildirip otyr
ORAL. QazAqparat - Batys Qazaqstan oblysynda 7 jáne 9 tamyz kúnderi 95 aýyldyq okrýg ákimin saılaý ótedi, dep habarlaıdy «QazAqparat» tilshisi.
BQO saılaý komıssııasy tóraǵasynyń orynbasary Vıacheslav Inochkınniń aıtýynsha, oblys boıynsha barlyǵy 289 úmitker tirkelgen, ár orynǵa úsh adamnan keledi. Aýyl ákimderin saılaý budan tórt jyl buryn, 2013 jyly tamyzda ótkizilgen bolatyn. Tórt jylda qyzmet merzimi bitetindikten, bıyl 151 aýyldyq okrýgtiń 95-inde saılaý ótedi. Qalǵan okrýgterde ákimderdiń qyzmet etý merzimi aıaqtalýyna oraı bolady. Ákimderdi Oral qalalyq jáne aýdandyq máslıhat depýtattary, ıaǵnı tańdaýshylar saılaıdy. 7 tamyzda Oral qalasy men Bókeı ordasy, Jánibek sııaqty aýdandarda, al 9-ynda Aqjaıyq, Bórli, Qaztalov, Terekti, Zelenov sekildi iri, negizinen biriktirilgen aýdandarda saılaý bolmaq. Oralda Krýgloozernyı, Jelaev aýyldarynda jańadan ákim saılanbaq.
Qazirgi kezde úmitkerler úgit-nasıhat jumystaryn júrgizýde.
