BQO-da aýrýhanaǵa júgingen aýyl turǵynynan koronavırýs tabyldy
ORAL. QazAqparat – Batys Qazaqstan oblysynda aýrýhanaǵa júgingen aýyl turǵynynan koronavırýs anyqtaldy, dep habarlaıdy QazAqparat tilshisi.
BQO ákimdigi málim etkenindeı, sońǵy anyqtalǵan 10 naýqastyń tórteýi – Reseıde jumys isteıtin Túrkistan oblysynyń turǵyndary.
Olar Reseımen shektesetin «Syrym» avtoótkelinen ótkennen keıin densaýlyqtaryna shaǵymy bolmaǵanmen, jedel járdemmen karantındik statsıonarǵa jatqyzylǵan.
Bes adam – buryn koronavırýspen aýyrǵandarmen baılanysta bolǵan oblys turǵyndary.
Taǵy bir adam – Syrym aýdanynyń turǵyny. Ol dene qyzýynyń kóterilýine baılanysty aýdandyq aýrýhana qyzmetine júgingen. Dáriger patsıentti qabyldap, zerthanalyq synama alǵan.
Naýqaspen qarym-qatynasta bolǵandar baqylaýǵa alyndy.
Epıdemıologııalyq sharalar júrgizilip, turǵynnyń aýrýdy qaıdan juqtyrǵany anyqtalý ústinde. Barsha turǵyndar jeke gıgıenalyq talaptar men karantındik shekteý sharalaryn saqtaýy kerek.
«Epıdtergeý qorytyndysy boıynsha aýdannyń karantınge qoıylý-qoıylmaýy belgili bolady», dep habarlady BQO taýarlar men kórsetiletin qyzmetterdiń sapasy men qaýipsizdigin baqylaý departamenti.
Oblysta kezeń-kezeńmen karantın sharalary jeńildetilip jatqanymen, indet qaýpi seıilmeı tur. Kúni búginge deıin barlyǵy 339 adam koronavırýsqa shaldyqsa, sonyń 180-i
jazylyp shyqty.
Eske sala keteıik, budan buryn BQO-da koronavırýs juqtyrǵan 4 naýqastyń aýyr halde ekendigin jazǵan bolatynbyz.
