BQO-da aýrýhanaǵa túsken 22 oqýshy tamaqtan ýlanbaǵan
ORAL. QazAqparat - 20 qarasha kúni Bórli aýdandyq aýrýhanasyna túsken balalardyń tamaqtan ýlanbaǵany anyqtaldy, dep habarlaıdy «QazAqparat» tilshisi.
BQO qoǵamdyq densaýlyq saqtaý departamentinen túsken málimetke qaraǵanda, «Ulttyq saraptama ortalyǵy» Bórli aýdandyq fılıaly júrgizgen zerthanalyq tekserýlerdiń barlyǵy bolymsyz nátıje kórsetken.
Atap aıtqanda, birinshi jáne ekinshi aýysym balalaryna berilgen sút qosyp pisirilgen kúrish botqasynan mıkrobıologııalyq tekseristerge, alma jemisinen nıtratty anyqtaý úshin jáne ishek qurttaryna synama alynǵan. Sondaı-aq, sút, balqytylǵan irimshik, maı, qubyr sýy, ashana quraldary, ydys, jumys kıimi, bes ashana qyzmetkeri tekserilgen. Olardan da eshteńe tabylmaǵan.
Qazirgi tańda balalar mektepte oqýlaryn jalǵastyrýda.
Eske sala keteıik , 20 qarasha kúni keshkisin Aqsaı qalasy mańyndaǵy Qyzyltal aýylyndaǵy mektepten ishi aýyryp, 22 bala túsken bolatyn. Sonyń 17-si 21 qarasha kúni shyǵarylǵan edi.
Bes bala medıtsınalyq baqylaý úshin aýrýhanada qalyp, onyń úsheýine «ót joldarynyń jedel dıskınezııasy, gastrıt», ekeýine «jedel gastrıt» dıagnozy qoıyldy. 22 qarasha kúni balalardyń jaǵdaıy jaqsaryp, aýrýhanadan shyǵaryldy.
