BQO-da aýrýdan maly shyǵynǵa ushyraǵan sharýalar ótemaqy ala ma
ORAL. KAZINFORM — Batys Qazaqstan oblysynyń Bókeı ordasy, Jańaqala, Kaztalov jáne Jánibek aýdandarynda sharýalar men turǵyndardyń maly aýyryp, shyǵynǵa ushyrady.
Sonyń biri, Bókeı ordasy aýdany Muratsaı aýyldyq okrýgi Taıǵara eldi mekeninde turatyn Ázilhan Bıarystanovtyń málim etkenindeı, indetten 20 bas buzaý, 1 sıyr ólgen.
Onyń sózine qaraǵanda, tek ózinde ǵana emes, aýyldaǵy maldyń kópshiligi dertke shaldyqqan.
— Maldyń aýzy jazylǵanymen, endi aıaqtary aqsap, júre almaı qaldy. Olardyń da mal bolmaıtyn túri bar. Aýyl sharýashylyǵy mınıstrligine habarlasyp edim, olar ólgen mal soıylyp, akt jasalýy kerek deıdi. Bizge mal dárigerleri bastapqyda olaı dep aıtqan joq. Bárin mal molalaryna laqtyrdyq. «Aýyl amanaty» baǵdarlamasy boıynsha nesıe alyp edim. Eń bolmasa ketken shyǵyn ótelse dep úmittenemin, — deıdi Á.Bıarystanov.
Osy másele boıynsha Kazinform tilshisi BQO aýyl sharýashylyǵy basqarmasyna arnaıy saýal joldaǵan edi.
Basqarma basshysynyń orynbasary Rústem Zulqashev bergen málimetke qaraǵanda, satyp alǵan maly aýrýǵa shaldyǵyp, shyǵynǵa qalǵan jaǵdaıda nesıelenýshi tulǵa «Aýyl amanaty» baǵdarlamasy boıynsha senim bildirilgen agentke (ókil) nesıeni bólip tóleý nemese merzimin uzartý boıynsha ótinishpen júginedi.
— Ótinishke baǵdarlama aıasynda satyp alynǵan malynyń shyǵynyn rastaıtyn arnaıy quzyrly mekemeniń (veterınar mamannyń anyqtamasy) dáleldi qujatyn qosa usynady. Sodan keıin senim bildirilgen ókil ótinishke sáıkes usynylǵan qujattar toptamasyn nesıeni qaraý jónindegi komıssııaǵa shyǵarady. Sosyn komıssııa tıisti sheshim qabyldaıdy, — deıdi R.Zulqashev.
BQO ákiminiń orynbasary Qalııar Aıtmuhambetov tórt túlik malǵa jasalyp jatqan emniń nátıjesi bar ekendigin jetkizdi.
— Kúni búginge deıin iri qaradan 28 bas mal shyǵyn boldy. Sondaı-aq tólderinen shyǵyn bar. Biraq barlyǵyna akt jasalmaǵan. Sony toltyrý jóninde tapsyrma berildi. Mal aýrýyna baılanysty synama qorytyndysy áli kele qoıǵan joq, — dedi Q.Aıtmuhambetov.
Májilis depýtaty, «Aýyl» partııasynyń tóraǵasy Serik Egizbaev atalǵan máseleniń baqylaýda, Aýyl sharýashylyǵy mınıstrligimen únemi baılanysta ekendigin naqtylady.
Sonymen qatar óńirde Aqjaıyq aýdany Taıpaq aýyldyq okrýginde de kıikterdiń ólip jatqanyn turǵyndar habarlady. Saldarynan mal da aýyryp, shyǵynǵa ushyrap otyr.
BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanov Taıpaqta da kıikter qyrylǵanyn rastady.
— Qazirgi tańda ólgen kıik sany 7 025 basqa jetti. Bul tsıfr kúnde ózgerip jatyr, — dedi ol.
Eske sala keteıik, budan buryn Batys Qazaqstanda 200-den astam mal qyrylǵanyn habarlaǵan edik. Sondaı-aq 3 300-ge jýyq kıiktiń óleksesi joıyldy.
