BQO-da aýrý taratatyn tyshqan tárizdi kemirgishter sany 10 ese ósken

ORAL. KAZINFORM – Batys Qazaqstan oblysynda ótken jyly búırek sındromdy gemorragııalyq qyzbamen aýyrǵan 27 adam tirkelgen. 

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngide málim etkenindeı, bul byltyrǵy statıstıkadan (3) 24 derekke kóp. 

Onyń sózine qaraǵanda, 2024 jyly Báıterek aýdanynda 14, Bórlide 7, Oral qalasynda 6 adam syrqattanǵan.

— Munyń kóbeıip ketýi sebepteriniń biri kóktemgi sý tasqynymen baılanysty bolyp otyr. Oral obaǵa qarsy stantsııasynyń aqparatyna súıensek, 2020-2024 jyldar aralyǵynda óńirde tyshqan tárizdi kemirgishter sany 10 ese ósken. Atalmysh dertke shaldyqqan naýqastardyń kemirgishtermen baılanysta bolǵany, balyq aýlaýǵa shyqqany, shóp shabý jumystaryna qatysqany anyqtaldy, - deıdi N.Mustaev. 

Mamannyń aıtýynsha, bul aýrýdyń aldyn alý úshin shóp shabý, egin oraǵy kezinde jáne kemirgishter bolýy múmkin shańdy bólmelerde respırator qoldaný kerek. Ekinshiden, kemirgishtermen lastanýy yqtımal ónimderdi qoldanbaý mańyzdy. Sonymen qatar ákimdikter tarapynan deratızatsııalyq jumystar ýaqytyly júrgizilýi qajet.

Eske sala keteıik, budan buryn Batys Qazaqstanda metapnevmovırýspen aýyrǵan 8 adamnyń teń jartysy balalar ekenin jazǵan bolatynbyz.