BQO-da aýyz sý men tamaq ónimderinen sáıkessizdikter anyqtaldy
ORAL. KAZINFORM – Batys Qazaqstan oblysynda 2025 jyly ortalyqtandyrylǵan sýmen qamtý nysandarynan 4 163 synama alynyp, sanıtarlyq-hımııalyq kórsetkishter boıynsha zertteldi.
BQO sanıtarııalyq-epıdemıologııalyq baqylaý departamentiniń basshysy Dınara Jańabergenovanyń málim etkenindeı, sonyń 210-y nemese 5 paıyzy sáıkes kelmedi.
Onyń sózine qaraǵanda, sáıkessizdik Aqjaıyq, Jańaqala, Jánibek, Báıterek, Syrym, Tasqala, Terekti jáne Shyńǵyrlaý aýdanynan anyqtaldy.
Sonymen qatar mıkrobıologııalyq kórsetkishter boıynsha 4 273 synamanyń 179-y nemese 4,2 paıyzy talapqa saı bolmaı shyqty. Bul Aqjaıyq, Bórli, Jańaqala, Jánibek, Báıterek, Syrym, Tasqala, Terekti, Shyńǵyrlaý aýdanyna qosa Oral qalasynda tirkeldi.
Sondaı-aq ortalyqtandyrylmaǵan sý kózderinen alynǵan 209 synamanyń sanıtarlyq-hımııalyq kórsetkishter boıynsha 25-si tórt aýdanda sáıkes bolmady. Mıkrobıologııalyq kórsetkishter boıynsha 194 synamanyń 24 sáıkessizdik bes aýdanda belgili boldy.
- Barlyq sáıkessizdik jaǵdaılary boıynsha sharýashylyq júrgizýshi sýbektilerge sýmen jabdyqtaý nysandaryn tazalaý, jýý jáne dezınfektsııalaý qajettigi týraly resmı hattar joldandy, - dedi D.Jańabergenova.
Onyń aıtýynsha, departament ónimderdiń qaýipsizdigine monıtorıng júrgizý jumystaryn atqaryp keledi. Sonyń barysynda ótken jyly 988 ónim synamasy satyp alynyp, zerttelgen. Sonyń 618-i azyq-túlik bolsa, 370-i – tamaq emes ónimder. Zertteý nátıjesinde 331 synamadan (munyń 73-i – tamaq ónimderi) sáıkessizdik tabyldy.
- Anyqtalǵan buzýshylyqtardyń negizgi bóligi ónim tańbalaýy talaptarynyń saqtalmaýymen baılanysty. Atap aıtqanda, keıbir ónimderde óndirýshi týraly aqparat, jaramdylyq merzimi, óndirilgen kúni kórsetilmegen, biryńǵaı EAEO tańbalaý belgisi bolmaǵan, sondaı-aq memlekettik tilde aqparat usynylmaǵan. Sáıkessizdik anyqtalǵan ónimder boıynsha satýdan alyp qoıý jáne keri qaıtaryp alý jóninde jedel den qoıý sharalary qabyldandy. Bul sharalar tehnıkalyq reglamentter men Eýrazııalyq ekonomıkalyq odaqtyń sanıtarııalyq talaptaryna sáıkes júzege asyryldy, - dedi departament basshysy.
Eske sala keteıik, budan buryn Batys Qazaqstan oblysynda shoshqa tumaýy da tirkelgenin jazǵan edik.
Sondaı-aq BQO-da salmonellezben aýyrǵandar sany eki eseden astamǵa ósti.