BQO-da aýylǵa kireberiste avtokólikter batpaqqa batyp jatyr – ákimdik jaýap berdi
ORAL. KAZINFORM – Batys Qazaqstan oblysy Báıterek aýdany Qarajar aýylyna kireberis jol ezilip ketkendikten, avtokólikterdiń batyp jatqany jóninde áleýmettik jelide beınejazba jarııalandy.

Beınejazbada er adam aýylǵa kireberiste bóget salynǵan joldyń mı batpaqqa aınalǵanyn aıtady. Atalǵan eldi meken Peremetnyı aýyldyq okrýgine kiredi. Okrýg ákimi Alekseı Gerasımov joldyń Báıterek aýdany turǵyn úı-kommýnaldyq sharýashylyǵy bóliminiń teńgeriminde ekendigin jetkizdi.
Bólim basshysy Aslan Daýbaevtyń sózine qaraǵanda, Qarajar aýylynyń kireberis jolyn sý basý qaýpiniń aldyn alý maqsatynda 2024 jyly sý ótkizý qubyrlary ornatylǵan.
- Sonymen qatar 2024 jyly atalǵan joldy jóndeýge jobalyq-smetalyq qujattama jasaqtaldy. Kúni búgin atalǵan joldy jóndeýge merdiger mekeme anyqtaldy. Mamyr aıynda jol jóndeý jumystary bastalady, - dedi Kazinform tilshisine A.Daýbaev.
Eske sala keteıik, budan buryn BQO-da qys ishinde asfalt tóselip jatqany jóninde jazǵan bolatynbyz.