BQO-da aýyldyń eki turǵyny qarý jáne esirtki zattaryn zańsyz saqtaǵan
ORAL. KAZINFORM — BQO polıtsııa departamentiniń ekstremızmge qarsy is-qımyl basqarmasy men Syrym aýdandyq polıtsııa bóliminiń qyzmetkerleri birlesip júrgizgen jedel izdestirý is-sharalary nátıjesinde eki aýyl turǵyny qarý men esirtki zattaryn zańsyz saqtaǵany úshin ustaldy.
BQO polıtsııa departamentiniń baspasóz qyzmetinen málim etkenindeı, kúdiktilerdiń turǵyn úılerin tintý barysynda tyıym salynǵan zattar tárkilendi.
Olardyń bireýinen tirkelmegen tegis uńǵyly ańshylyq myltyq, 6 oq-dári, qorada jasyrylǵan jasyl tústi, untaqtalǵan ósimdik tektes (esirtkige uqsas) 500 gramnan astam zat, qoldanylǵan 6 shprıts pen plastık bótelke tabyldy.
Ekinshisiniń úıinen gazetke oralǵan ósimdik tektes zat, aýlasynan taǵy úsh paket, ósimdik zaty bar úsh shprıts, esirtkini daıyndaýǵa jáne tutynýǵa arnalǵan arnaıy qurylǵylar shyqty.
— Atalǵan derek boıynsha qylmystyq is qozǵaldy. Barlyq tárkilengen zatqa sot-hımııalyq jáne ballıstıkalyq saraptamalar taǵaıyndaldy. Qazirgi ýaqytta esirtki zattarynyń shyǵý kózin anyqtaýǵa baǵyttalǵan tergeý amaldary júrgizilip jatyr, — dep habarlady vedomstvodan.
Eske sala keteıik, budan buryn BQO turǵyny jasyryn jylyjaıda esirtki ósirgenin jazǵan edik.