BQO-da aýyldasyna oq atyp, jaraqat keltirgen eki turǵyn sottaldy

ORAL. KAZINFORM — Oral qalalyq sotynda Tilegen Meıirhanov pen Meıirbek Esenovke qatysty úkim shyqty.

BQO sotynyń baspasóz qyzmetinen málim etkenindeı, T.Meıirhanov QR QK 106-baby 2-bóligi 7-tarmaǵy, 293-baby 3-bóligine sáıkes kináli dep tanyldy. QR QK 58-baby 3-bóligi qoldanylyp, ol túpkilikti 8 jyl merzimge bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy.

M.Esenovke QR QK 293-baby 3-bóligine sáıkes 6 jyl merzimge bas bostandyǵynan aıyrý jazasy kesildi. Jazasyn qaýipsizdigi ortasha qylmystyq-atqarý júıesi mekemesinde óteý belgilendi. Osyǵan deıin úıqamaqta bolǵan M.Esenov sot zalynda qamaýǵa alyndy. 

Sot talqysynda belgili bolǵanyndaı, sottalýshylar bıylǵy 14 qańtarda Oral qalasyna qarasty Krýgloozernyı aýylynda jábirlenýshi Kırıll Irtıkeevti telefon arqyly kóshege shaqyryp alǵan. Olar qoldaryna myltyq alyp, aldyn ala sóz baılasyp, atys qarýyn qoldanǵan. T.Meıirhanov buryn bolǵan janjal týraly aıtyp, jábirlenýshini tizerletip, qaıta turǵyzǵan. Onymen toqtamaı, myltyqtyń tumsyǵyn súıýge májbúrlegen. Aqyry oq atyp, jábirlenýshiniń oń qoly men ish tusyna jaraqat keltirgen.

Sottalýshylardan jábirlenýshiniń paıdasyna 1 mln 272 myń teńge materıaldyq jáne 5 mln teńge kóleminde moraldyq zalal óndirildi.

Sot úkimi zańdy kúshine engen joq.

Eske sala keteıik, budan buryn BQO-da eki turǵyn aýyldasyna oq atyp, óltirmek bolǵanyn jazǵan edik.