BQO-da aýyldaǵy qoqys polıgonynan medıtsınalyq qaldyqtar tabyldy
ORAL. KAZINFORM – Batys Qazaqstan oblysy Báıterek aýdany Baıqonys aýyly turǵyndarynyń qoqys aýmaǵynan qan synamalary men shprıtsterdi taýyp alǵany jóninde beınejazba jarııalandy.
Qoǵam belsendisi Almagúl Iqsanovanyń Instagram áleýmettik jelisinde málim etkenindeı, qaýipti medıtsınalyq qaldyqtardan adamdardyń aýrý juqtyrýy yqtımal.
– Oqıǵa ornyna prokýratýra ókilderin shaqyryp, tıisti shara alynýyn suradyq. Medıtsınalyq qaldyqtar laqtyrylǵan jerden ózen de qashyq emes, - deıdi A.Iqsanova.
Osyǵan baılanysty Kazinform tilshisi BQO sanıtarııalyq-epıdemıologııalyq baqylaý departamentine arnaıy saýal joldady.
Báıterek aýdany sanıtarııalyq-epıdemıologııalyq baqylaý basqarmasynyń málimetinshe, 5 maýsym kúni Baıqonys aýylyndaǵy qoqys aýmaǵynan medıtsınalyq qaldyqtar, sonyń ishinde qoldanylǵan shprıtster, bıologııalyq materıaly bar probırkalar tabylǵan.
Habar túskennen keıin basqarma mamandary polıtsııa jáne basqa múddeli memlekettik organdar qyzmetkerlerimen birge oqıǵa ornyna shuǵyl jetti. Tekserý barysynda medıtsınalyq qaldyqtardyń tógilgeni rastaldy.
– Atalǵan derek boıynsha materıal polıtsııa organynda tirkeldi. Tekserý júrgizilip, oqıǵanyń tolyq mán-jaıy anyqtalý ústinde. Aldyn ala málimet boıynsha medıtsınalyq qaldyqtardy jınaý jáne joıýmen aınalysatyn uıym qaldyqtardy aparýy múmkin. Qazirgi kezde atalǵan aýmaq tıisti organdardyń baqylaýynda. Tekseris qorytyndysyna sáıkes kináli adamdardyń áreketine quqyqtyq baǵa berilip, QR zańnamasy talaptaryna sáıkes shara qoldanylady. Tekseris qorytyndysyna sáıkes qosymsha aqparat beriledi, - delingen resmı jaýapta.
Báıterek aýdany ákimdiginiń naqtylaýynsha, 4 maýsym kúni saǵat 23.30 shamasynda Baıqonys aýyldyq okrýgi aýmaǵynda ornalasqan qatty turmystyq qaldyqtar polıgonyna «GAZel» avtokóligimen qaldyqtardy zańsyz tógý deregi anyqtaldy.
Ákimdik málimetine qaraǵanda, tekserý barysynda atalǵan adam medıtsınalyq maqsatta paıdalanylǵan synama alý probırkalaryn, beıneampýlalardy jáne ózge de medıtsınalyq qaldyqtardy tógý kezinde quqyq qorǵaý organdary qyzmetkerlerimen oqıǵa ornynda ustaldy.
Oqıǵa ornyna aýdan prokýratýrasynyń jáne sanıtarııalyq-epıdemıologııalyq baqylaý basqarmasynyń ókilderi kelip, tıisti tekserý jumystaryn júrgizdi. Qazirgi ýaqytta atalǵan derek boıynsha barlyq mán-jaılar anyqtalýda, tergeý amaldary jalǵasýda. Sanıtarııalyq-epıdemıologııalyq baqylaý qyzmetiniń mamandary tarapynan tıisti ákimshilik hattama toltyryldy.
– Atalǵan is boıynsha quqyq qorǵaý organdary tergeý jumystaryn júrgizýde. Jaǵdaı jergilikti atqarýshy organdardyń turaqty baqylaýynda, - delingen aýdan ákimdigi jibergen aqparatta.
Eske sala keteıik, budan buryn BQO-da tazartý qondyrǵysy janynda káriz sýy dalaǵa aǵyp jatqanyn jazǵan edik.
