BQO-da aýyl turǵyndarynyń jaıylymdyq jeri satylyp ketkeni ras pa
ORAL. KAZINFORM – Batys Qazaqstan oblysy Tasqala aýdany Amangeldi aýylynyń turǵyndary jaıylymnan tarshylyq kórip otyrǵany jóninde áleýmettik jelide málimet tarady.
BQO qoǵamdyq keńesiniń múshesi, zańger Baýyrjan Ahmetjannyń málim etkenindeı, aýdan ákimdiginiń 2018 jylǵy 4 jeltoqsandaǵy qaýlysymen «Brat.M» JShS dırektory Baýyrjan Sakpıreevke Amangeldi aýyldyq okrýginde 760 ga jaıylym jáne 521 ga egistik 10 jylǵa jalǵa berilgen.
Onyń sózine qaraǵanda, jaıylym paıdalanylmaǵandyqtan, BQO jer resýrstaryn basqarý departamenti tekserip, 2026 jylǵy 1 sáýirge deıin nusqama bergen. Egistik tek 2023 jáne 2024 jyldary paıdalanylǵan. 2025 jyly 13 qańtarda jaıylym Aınagúl Irkýbaevaǵa satylǵan.
- Turǵyndar kezinde berilip ketken osy jerdi aýylǵa keri qaıtaryp, mal jaıylymy retinde paıdalaný qajettigin talap etip otyr. Shyn mánisinde Jer kodeksiniń 26-baby 3-tarmaǵy jáne «Jaıylymdar týraly» Zańynyń 13-baby 2-tarmaǵyna saı kópshilik jaıylymdar jeke menshikke berilmeıdi, jeke maldaryn jaıý úshin halyq muqtajyna ǵana paıdalanylady, - dedi B.Ahmetjan.
Amangeldi aýylynda turatyn zeınetker Saılash Ájǵalıeva mal jaıylatyn jerdi keri qaıtarý baǵytynda turǵyndarmen birlesip hat jazyp, jergilikti atqarýshy organdardyń aldynan ótkendikterin jetkizdi.
- Segiz shaqyrymǵa deıin jer aýyldyń jaıylymy bolýy kerek. Aýyl turǵyndary bolyp osy máselemizdiń sheshilgenin qalaımyz. Óz jerimizdi qaıtyp alǵymyz keledi. Sondaı-aq aýylda asfalt jol joq. Elektr jaryǵy eki kúnniń birinde sónedi. Sonyń saldarynan turǵyndardyń turmystyq tehnıkalary janyp ketedi. Aýyl halqy bolyp osynyń bári sheshimin tapsa deımiz, - dedi S.Ájǵalıeva.
Osy máselege oraı Kazinform tilshisi Tasqala aýdany ákimdigine arnaıy saýal joldaǵan edi.
Ákimdik málimetine qaraǵanda, Amangeldi aýyly turǵyndarynyń mal jaıylysyna jalpy jer balansy esebinde eldi meken jerleriniń kólemi – 3 235 gektar.
Amangeldi aýyldyq okrýginiń eldi meken jerleri mańynda ornalasqan aýyl sharýashylyǵy maqsatyndaǵy jerler esebinen QR Jer kodeksine jáne qaǵıdalarǵa sáıkes №4 lot boıynsha kólemi 760 ga jaıylym jáne №11 lot boıynsha 521 ga egistik jer ýchaskesine ótkizilgen konkýrsta «BRAT.M» JShS (dırektory B.Sakpıreev) jeńimpaz bolyp tanylǵan. Qazirgi ýaqytta atalǵan jer ýchaskeleriniń jer paıdalaný quqyqtary 2025 jylǵy 13 qańtardaǵy №67 satyp alý-satý shartymen A.Irkýbaevaǵa (býhgalteri) aýysqan. Osy eldi mekenge jaqyn ornalasqan JShS-nyń jer ýchaskeleri, sonyń ishinde 760 ga jaıylym jerine nysanaly maqsatyna saı paıdalanbaýyna baılanysty tekseris júrgizý úshin tıisti qujattar Batys Qazaqstan oblysy boıynsha jer resýrstaryn basqarý departamentine joldanyp, nusqama berildi.
- Tasqala aýdany kásipkerlik jáne aýyl sharýashylyǵy bóliminiń anyqtamasyna sáıkes kólemi 521 ga egistik jerleri eki jyl qatarynan, ıaǵnı 2023, 2024 jyldary paıdalanylǵan. Sonymen birge Amangeldi aýylyna jaqyn ornalasqan 890 ga bos jer ýchaskesi turǵyndardyń mal jaıylymyna qarastyrylǵan. Aýyldyń eldi meken jerlerinen sharýa qojalyǵyn júrgizý úshin jer ýchaskeleri berilmegen, - delingen resmı jaýapta.
Eske sala keteıik, budan buryn Batys Qazaqstanda 122 myń gektar jerdiń paıdalanylmaı jatqany anyqtalǵanyn jazǵan edik.