BQO-da aýyl turǵyndary jaıylym jer joqtyǵyn aıtyp shaǵymdandy
ORAL. KAZINFORM — Batys Qazaqstan oblysy Báıterek aýdany Mıchýrın aýyldyq okrýgine qarasty Jambyl eldi mekeniniń turǵyndary jaıylym jerdiń joqtyǵy jóninde másele kóterdi.
BQO qoǵamdyq keńesiniń múshesi, zańger Baýyrjan Ahmetjannyń málim etkenindeı, atalǵan eldi mekende 150 úı bar, onda 700 adam turady, sonyń ishinde 200-i — jasóspirimder.
Onyń sózine qaraǵanda, mal basy — 80 bas sıyr, 30 bas jylqy, 1 500 qoı-eshki. Sońǵy úsh jylda jaıylymnyń joqtyǵynan mal basy úsh esege azaıǵan.
— Aýyl mańyndaǵy jer telimderiniń basym bóligi qojalyqtarǵa berilgen nemese olar jeke menshikke satyp alǵan, aýyldan 200-300 metrden ári bos jer múldem joq. Jer kodeksiniń 26-baby 3-tarmaǵyna sáıkes, azamattar men memlekettik emes zańdy tulǵalardyń bólek menshigine jáne jer paıdalanýyna turǵyn halyqtyń muqtajyna paıdalanylatyn jáne soǵan arnalǵan, onyń ishinde aýyldyq eldi mekender shekarasy shegindegi shabyndyq alqaptar berilmeıdi. Mine, osy oraıda aýyl turǵyndarynyń quqyqtary men zańdy múddeleri buzylyp otyr, — deıdi B.Ahmetjan.
Turǵyndardyń aıtýynsha, kúnkóris kózi — mal bolǵanymen, ony kóbeıtýdiń múmkindigi joq. Aınala jer qorshalǵandyqtan, maldy tek joldyń boıymen aıdaýǵa týra keledi. Sý jaǵalaýy zańsyz jabylǵandyqtan, malyn da sýara almaıdy.
Mıchýrın aýyldyq okrýginiń ákimi Maksım Mýsalımovtiń túsindirýinshe, aýyldan 5-6 shaqyrymdaı jerde mal jaıýǵa bolatyn 30-50 gektardaı jer bar.
Osy máselege oraı Kazinform tilshisi Báıterek aýdany ákimdigine arnaıy saýal joldaǵan edi.
Ákimdik málimetine sáıkes jaıylymdyq jerler qoldanystaǵy zańǵa sáıkes jeke menshikke jáne jalǵa berilgen.
Turǵyndardyń ótinishine sáıkes, mal jaıýǵa arnalǵan jerlerdi tıimdi paıdalaný jáne baqylaý máselesi nazarǵa alynyp, qosymsha zerdeleý jumystary júrgiziledi. Sonymen qatar jaǵalaý aýmaǵyn qorshatpaý máselesi qatań baqylaýǵa alyndy.
Turǵyndar tarapynan kóterilgen jer máseleleri zerdelenip, zańdylyǵy tekseriledi. Atalǵan jerler burynǵy basshylyq kezeńinde (2013-2014 jyldary) berilgen.
Jambyl aýylynyń irgesi 1978 jyly qalanǵan. Negizi baǵyty -egistik jáne kókónis, baý-baqsha ónimderimen aınalysqan. Sondyqtan mal sharýashylyǵyn damytýǵa baǵyttalmaǵan. Sońǵy jyldary ońtústik aýdandardan turǵyndar kóship kelýine baılanysty turaqty mal ustaý daǵdyǵa aınalyp, jer jetispeý máselesi týyndap otyr. Jalpy, aýdan boıynsha 80 myńǵa jýyq gektar jaıylymdyq jerler jetispeýshilik máselesi bar. Sol sebepti ár bosaǵan jerdi jaıylymdyq jerlerge aýystyrý baǵytyndaǵy jumystar júrgizilip jatyr.
— Turǵyndar sondaı-aq aýylishilik joldarǵa jóndeý jumystarynyń qashan bastalatyny jóninde másele qozǵady. 2023 jyly Jambyl aýylynyń kireberis jolyn jóndeý jumystary tolyq aıaqtaldy. Qazirgi ýaqytta aýyl ishindegi joldarǵa qatysty smetalyq qujattama ázirge joq. Báıterek aýdany boıynsha 6-7 eldi mekenniń kireberis joldary jóndeýdi qajet etedi. Osy eldi mekenderdiń kireberis joldaryn jóndeý jumystary aıaqtalǵannan soń, Jambyl aýylynyń ishki joldary máselesi qarastyrylatyn bolady, — delingen resmı jaýapta.
Eske sala keteıik, budan buryn BQO-da aýyl turǵyndarynyń jaıylymdyq jeri satylyp ketkeni ras pa, sony jazǵan bolatynbyz.
